દાહોદ જિલ્લો કોરોના વાયરસની બીજી લહેરની ચપેટમાં આવી જનારા દર્દીઓને સારવારમાં કોઇ પણ પ્રકારની ઉણપ ના રહે એ માટે દિનરાત મહેનત કરી રહેલા જિલ્લા વહીવટી તંત્ર દ્વારા 708પથારીની સુવિધા સાથેના આઠ કોવિડ કેર સેન્ટર કાર્યરત કરી દેવામાં આવ્યા છે. જેથી હવે સામાન્ય દર્દીઓને તાલુકા મથકોએ પણ સારવાર આપી શકાશે. દાહોદના કલેક્ટર વિજય ખરાડી અને જિલ્લા વિકાસ અધિકારી રચિત રાજ દ્વારા કોવિડ કેર સેન્ટર શરૂ કરવા માટે પ્રાંત કચેરી તથા આરોગ્ય વિભાગને સૂચનાઓ આપવામાં આવી હતી. સ્થાનિક ટીમો દ્વારા કેટલાક સ્થળો સૂચત કર્યા હતા. જેના આધારે આ કેર સેન્ટર બનાવવામાં આવ્યા છે. જેમાં દાહોદની એન્જીનીયરિંગ તથા પોલીટેકનિક બોયઝ હોસ્ટેલમાં 120-120, ગરબાડાની મોડેલ સ્કૂલમાં 48, ઝાલોદની આદર્શ નિવાસી કન્યા શાળામાં 50, ફતેપુરમાં વાંગડ સ્થિત કસ્તુરબા ગાંધી વિદ્યાલયમાં 70, સંજેલીમાં થાળા સ્થિત કસ્તુરબા ગાંધી વિદ્યાલયમાં 50, ધાનપુરમાં પાવની કસ્તુરબા ગાંધી વિદ્યાલયમાં 50 અને દેવગઢ બારિયાના સ્પોર્ટ્સ કોમ્પ્લેક્સમાં 200 પથારીની સુવિધા સાથેના કોવિડ કેર સેન્ટર કાર્યરત કરી દેવામાં આવ્યા છે. રાજ્ય સરકાર દ્વારા આદિવાસી વિસ્તારમાં ઉભું કરવામાં આવેલું ઇન્ફ્રાસ્ટ્રક્ચર આ આપત્તિના સમયે કામમાં આવ્યું છે. આ આઠ સ્થળોએ કુલ 708 પથારીની સુવિધા ઉભી કરી દેવામાં આવી છે.

તદ્દઉપરાંત, જિલ્લા વહીવટી તંત્ર દ્વારા હજુ બીજા 13 સ્થળોએ તૈયાર કરવામાં આવેલા કોવિડ કેર સેન્ટરની ૭૭૭ પથારીઓ સ્ટેન્ડ બાય રાખવામાં આવી છે.