દાહોદ ખેતીવાડી ઉત્પન્ન બજાર સમિતિના ચેરમેનની ચૂંટણીમાં વર્તમાન ચેરમેન કનૈયાલાલ કિશોરી જ બિનહરીફ રહેતા પુન: નિયુક્તિ થઈ હતી. દાહોદ એ.પી.એમ.સી.ના ચેરમેનનો કાર્યકાળ પુરો થતા સંસ્થાના સભાખંડમાં તા.21/11/2020ના રોજ ચૂંટણી અધિકારી જિલ્લા રજીસ્ટ્રાર એસ.આર. પટેલના વડપણ હેઠળ ચૂંટણી યોજાઈ હતી. જેમાં ખેડૂત વિભાગના-વેપારી વિભાગના અને સરકાર તરફના 2 મળી તમામ 17 ડિરેક્ટર્સ ઉપસ્થિત રહ્યાં હતા.

આ સમયે વેપારીઓ વતી શૈલેષભાઈ ગિરધરલાલ શેઠે ચેરમેન તરીકે વર્તમાન ચેરમેન કનૈયાલાલ કિશોરીના નામની દરખાસ્ત મૂકતા તેમની સામે કોઈએ પણ ઉમેદવારી ન નોંધાવતા કનૈયાલાલ કિશોરી ચેરમેન તરીકે બિનહરીફ વિજેતા જાહેર થયા હતા. આ સમયે પોલીસ બંદોબસ્ત વચ્ચે સભાખંડમાં યોજાયેલી આ પ્રક્રિયા દરમિયાન સભાખંડની બહાર મોટી સંખ્યામાં ઉપસ્થિત વેપારીઓ તેમજ ખેડૂત અગ્રણીઓએ અને ભારતીય જનતા પાર્ટીના અગ્રણીઓએ ઢોલનગારા અને આતશબાજી સાથે કનૈયાલાલની સતત ચોથી વખત થયેલી વરણીને આવકારી અભિનંદન આપ્યા હતા.