પ્રતિકારત્મક તસ્વીર

દાહોદ જિલ્લામાં ઘરફોડ ચોરી અને દારૂની હેરાફેરીના ગુનામાં ફરાર ત્રણ યુવકોને એલસીબીએ બાતમીના આધારે કોમ્બિંગ કરીને ઝડપી પાડ્યા હતાં. આ ત્રણેને સબંધિત પોલીસ મથકે સોંપી દેવામાં આવતાં કાયદેસરની કાર્યવાહી હાથ ધરવામાં આવી હતી. રેન્જ ડીઆઇજી એમ.એસ ભરાડા અને એસ.પી હિતેશ જોયસરની સુચનાથી દાહોદ એલસીબી પીઆઇ બી.ડી શાહ દ્વારા નાસતા ફરતા આરોપીઓને પકડવા માટે કોમ્બિંગનું આયોજન કર્યુ હતું. બાતમી મળતા દાહોદ શહેર નજીક આવેલા ગલાલિયાવાડ ગામમાં રહેતાં ભોલાભાઇ કૈલાશભાઇ સીસોદીયાને ઝડપવામાં આવ્યો હતો.

ભોલાભાઇ દાહોદ તાલુકા પોલીસ મથકના મારામારી અને દારૂની હેરાફેરીના ગુનામાં વોન્ટેડ હોવાનું ખુલ્યુ હતું. તેવી જ રીતે ધાનપુર પોલીસ મથકની હદના ઘરફોડ ચોરીના ગુનામાં છેલ્લા આઠ વર્ષથી ફરાર કાણાકૂવા ગામના જવસિંગ વરસિંગ ડામોરને પણ તેના ઘરેથી ઝડપી પાડવામાં આવ્યો હતો.

દેવગઢ બારિયા પોલીસ મથકની હદના દારૂની હેરાફેરીના ગુનામાં બે વર્ષથી ફરાર હાથીયાવન ગામનો મનસુખ મડીયા ઉર્ફે મુળિયા મેડા દુધિયા ચોકડી ઉપર આવનાર હોવાની બાતમી મળી હતી. તેના આધારે વોચ ગોઠવીને મનસુખને ઝડપી પાડવામાં આવ્યો હતો. આ ત્રણે વોન્ટેડ આરોપીઓને સબંધિત પોલીસ મથકે સોંપી દેવામાં આવતાં તેમની ધરપકડ કરીને કાર્યવાહી હાથ ધરવામાં આવી હતી.