દાહોદ જિલ્લાના ફતેપુરા તાલુકાના એક ગામની એક યુવતીનું ઝાલોદ તાલુકાના યુવકે અપહરણ કર્યાની ફરિયાદ નોંધાઇ હતી. જેમાં આ યુવતી સગીરા હોવાનુ જે તે સમયે જણાવીને તેના પુરાવા માટે શાળા છોડ્યાના પ્રમાણ પત્રની નકલ રજૂ કરવામાં આવી હતી. જેથી પોક્સો સહિતની કલમો અન્વયે ગુનો નોંધવામાં આવ્યો હતો. જોકે, વધુ તપાસમાં બહાર આવ્યુ કે, યુવતીના પિતાએ પ્રમાણપત્રની નકલમાં છેડછાડ કરી સુધારો કર્યો હતો. જેથી પોલીસે હવે પિતા સામે ગુનો નોંધી કાયદેસરની કાર્યવાહી હાથ ધરી છે.

ઘટનાની વિગતો મુજબ, લગભગ 15 દિવસ પહેલાં અપહરણની ફરિયાદ સુખસર પોલીસ મથકે નોંધાઇ હતી. જેમાં યુવતી સગીરા હોવાનુ જણાવી તેના પિતાએ પોતાની દીકરીના શાળા છોડ્યાના પ્રમાણપત્રની નકલ રજૂ કરી હતી. જેથી પોલીસે પોક્સો એક્ટની કલમ પણ લગાવી હતી. જેની તપાસ ઝાલોદના સી.પી.આઇ એમ.જી.ડામોર કરી રહ્યા હતા.

આ તપાસમાં રજૂ કરેલા દસ્તાવેજોની ચકાસણી શરુ કરવામાં આવી હતી. જેમાં આ યુવતીએ જુદી જુદી બે શાળામાં અભ્યાસ કર્યો હોવાથી શાળા છોડ્યાના પ્રમાણ પત્ર ઉપરથી તેની ઉંમર કેટલી છે તેની તપાસ હાથ ધરવામાં આવી હતી. કારણ કે યુવતીના પિતા પાસે જન્મ તારીખનો દાખલો ન હતો.

આ તપાસમાં યુવતીના પિતાનો ભાંડો ફુટી ગયો હતો કારણ કે, પોતાની દીકરીને સગીરા બતાવવા માટે તેમણે શાળા છોડ્યાના પ્રમાણપત્રની નકલમાં છેડછાડ કરી હતી. યુવતિની સાચી જન્મ તારીખ 9-3-2007 હતી. તેને બદલે નકલમાં ત્રીજા મહિનાને બદલે સાતમો મહિનો કરી દઇને નકલ ફરીથી કઢાવી તે રજૂ કરવામાં અઆવી હતી, પરંતુ શાળાના અસલી દસ્તાવેજ પરથી દુધનું દુધ અને પાણીનું પાણી થઇ ગયુ હતુ. છેડછાડ કરેલી નકલમાં જન્મ તારીખ 9-7-2007 દર્શાવાઇ હતી. આમ પર્દાફાશ થઇ જતાં ઝાલોદના સી.પી.આઇ એમ.જી.ડામોરે યુવતીના પિતા હિંમતભાઇ કમલાભાઇ ભાભોર સામે સુખસર પોલીસ મથકે ફરિયાદ નોંધાવતા હવે જે તે સમયના ફરિયાદી જ આરોપી બની ગયા છે.