આરોપીઓને રિમાન્ડ માટે કોર્ટમાં રજૂ કર્યા હતાં.

ધાનપુર તાલુકાના ખજુરી ગામમાં પ્રેમી પાસે જતી રહેલી પત્નીને તાલિબાની સજાના ભાગ રૂપે પતિએ તેને ખભે બેસીને ગામમાં તેનો વરઘોડો કાઢી તેને નિર્વસ્ત્ર કરવાની ઘટનાએ ખળભળાટ મચાવ્યો હતો. ત્યારે બુધવારે ભાસ્કર ઘટના બની હતી તે ખજુરી ગામનો ગ્રાઉન્ડ રિપોર્ટ કર્યો હતો. જેમાં પિડીતાની માતાએ પ્રતિનિધી સાથે વાત કરતાં જણાવ્યુ હતું કે, ‘મારી દીકરીને ત્રણ કલાક ફેરવી, ચીંથરા ખેંચી નાંખ્યા, તેનું છૂટું કરાવો, આરોપીઓને કડક સજા કરાવો’. સૌથી આશ્ચર્યજનક બાબત એ હતી કે, જે યુવતિ સાથે આ અમાનવિય ઘટના બની છે તેની પાસે આધાર કાર્ડ અને ચુંટણી કાર્ડ પણ નથી.

આ માટે એક્શનમાં આવેલી પોલીસે તાત્કાલિક અસરથી આ બંને પુરાવા બનાવડાવવાની કાર્યવાહી હાથ ધરી છે. ખજુરી ગામમાં કોઇ પણ ફોરવ્હીલ પ્રવેશે તો કેટલાંક ધારી-ધારીને જોતા તો કેટલાંક રસ્તો જ બદલી નાખતાં હતાં. ઘટનાની પુછપરછ કરતાં અમને કંઇ ખબર નથી તેવો જ જવાબ દરેક આપી રહ્યા હતા.

ઘટના બની હતી તે વન ફળિયું વેરાન થયું છે. કોઇ ઘરને તાળા તો કોઇ ઘરને સાંકળ મારેલી જોવા મળી. રસ્તા પર બાળકો-યુવતિઓ હતાં તેમણે જણાવ્યુ કે, પોલીસ બધાને લઇ ગઇ છે. બનાવનું જાણવા મળતાં અમે ખબર જોવા આવ્યા છીએ.

જે મહિલાઓએ યુવતિને વધુ લજ્જિત થતાં બચાવી તે પણ ઘરે જોવા મળી ન હતી. સાંકડા રસ્તા ઉપર યુવતિને ફેરવવા સાથે તેને નિર્વસ્ત્ર કરવામાં આવી હતી. કાર્યવાહીના ભાગ રૂપે પીડીતાને ધાનપુર પોલીસ મથકે લઇ જવાઇ હતી. યુવતીના માતા-પિતા તેની સાથે ખડેપગે રહ્યા હતાં.

ખજૂરીની નારી ગૌરવ હનનની ઘટનામાં 19 પૈકી 14 પકડાયા, 3 સગીર, 11ને 16મી સુધીના રિમાન્ડ
પરિણીતા સાથે નારી ગૌરવહનનના બનેલા બનાવમાં દાહોદ જિલ્લા પોલીસે કરેલી પ્રોએક્ટિવ કામગીરીને પગલે બુધવાર સુધીમાં 19 પૈકી 14ને પકડી પાડવામાં આવ્યા છે. તેમા 3 સગીરવયના છે. 1114 પૈકીના 11 લોકોને 16મી તારીખ સુધી રિમાન્ડ ઉપર રાખવાનો કોર્ટે હુકમ આપ્યો છે. સાથે જિલ્લા વહીવટી તંત્ર દ્વારા આવા બનાવો બનતા રોકવા માટે હ્યુમન બિહેવિયરલ ચેન્જના લાંબાગાળાના પગલાંઓ પણ જાહેર કરવામાં આવ્યા છે.

ખજુરી ગામના ધૃણાસ્પદ કિસ્સામાં પોલીસે ત્રણ સગીર સહિત 14 લોકોની ધરપકડ કરી હતી. તેમને બુધવારે કોર્ટેમાં રજૂ કરીને આ ઘટનામાં મોબાઇલ જપ્ત કરવા સાથે પીડીતાના કપડા કબજે કરવા, બીજા કેટલાં લોકો શામેલ હતા અને હજી કોણે વિડિયો ઉતાર્યા છે તે સહિતની તપાસ, પુછપરછ બાકી હોવાના મુદ્દા કોર્ટ સમક્ષ રજૂ કર્યા હતાં. કોર્ટે 11 આરોપીયોને 16મી તારીખની સાંજ સુધી રિમાન્ડ ઉપર રાખવાની પરવાનગી આપી હતી.

દાહોદ કલેક્ટર ડો. હર્ષિત ગોસાવી તથા જિલ્લા પોલીસ વડા હિતેશ જોયસરે જણાવ્યુ હતું કે, પીડિત પરિણીતાનું પોલીસે પ્રથમ કાઉન્સેલિંગ કર્યું હતું અને બાદમાં ફરિયાદને આધારે પોલીસે જિલ્લાના અન્ય પોલીસ સ્ટેશનના જવાનોની મદદ લઇ કોમ્બિંગ કરી આરોપીઓને ઝબ્બે કર્યા હતા. પીડિતાને પણ હાલમાં રક્ષણ આપવામાં આવ્યું છે. ઘટનાના વિડીઓ સોશ્યલ મીડિયા પ્લેટફોર્મ ઉપર ચઢાવનારા એકાઉન્ટ સામે પણ રિપોર્ટ કરવાની કાર્યવાહી પોલીસ તંત્રે કરી છે.

ઘટના બાદ મહિલા અને બાળ સુરક્ષાની કચેરીની ટીમ દ્વારા પીડિતાની મુલાકાત લઇને કાઉન્સેલિંગ કરવામાં આવ્યું અને નારી સંરક્ષણ ગૃહમાં સમાવવાની વાત મૂકાઇ છે. જો કે પીડિતાએ પરિવાર સાથે રહેવાની ઇચ્છા દર્શાવી છે. એ બાબતને ધ્યાને રાખી પોલીસે હાલમાં તેમને રક્ષણ પૂરૂ પાડ્યું છે.

દીકરી-પૌત્રીને પાળી લઇશું, આ લોકોને કડક સજા કરો… પીડિતાની માતા
‘‘મારે ચાર બાળકો છે, બધાના લગન કરી દીધા છે.કોઇને તકલીફ નથી. મારી આ બીજા નંબરનીને જમાઇ ત્રાસ આપતો હતો. એટલે અમે મજુરી કામે તેને અમારી સાથે જ રાખતા હતાં. મારી છોકરીને ત્રણ કલાક ફેરવી હતી. તેના ચીથરા ખેંચી નાખ્યા, તેમને કડકમાં કડક સજા થવી જોઇયે. પોલીસે અમને ઘણો સાથ આપ્યો, મારી દિકરીનું છુટ્ટુ કરાવી આપો.’’ આ શબ્દો છે 6 જુલાઇના રોજ પતિને ખભે બેસાડીને વરઘોડો કાઢવા સાથે નિર્વસ્ત્ર કરાઇ હતી તે યુવતિની માતાના છે. પૂત્રી સાથે બનેલી ઘટના અંગે તેણે વ્યથા ઠાલવતા જણાવ્યુ હતું કે, મારી છોકરી જતી રહેતાં તેને ઘરે મોકલવા અમે અમારા શેઠની ગાડી ભાડે કરાવી આપી હતી. મારા છોકરા અને જમાઇને પણ સાથે મોકલ્યો હતો. ખજુરી વાળા બળજબરીથી તેમના ગામે લઇ ગયા હતાં. અમે આ માટે પોલીસમાં જાણ કરવાના હતા પણ અમારા પરિવારમાં મરણ થઇ જતાં રોકાયા હતાં. તે પહેલાં મોબાઇલમાં વિડિયો આવી ગયા હતાં. મારી છોકરીને હવે તેના પતિ પાસે નથી રાખવી, તેને અને તેની છોકરીને અમે પાળી લઇશું. આ લોકોને કડકમાં કડક સજા થવી જોઇયે. મારી છોકરી સાથે જે થયું એવુ બીજી કોઇ છોકરી સાથે ના થવું જોઇયે. (યુવતી માતા સાથેની વાતચીતના આધારે)