દાહોદ તાલુકાના બોરવાણી ખાયા ફળીયાના જંગલમાં રેલવે લાઇનની બાજુમાંથી મૃત મળેલા રમુડાભાઇ મેડાની હત્યાનો ભેદ ગણતરીના દિવસોમાં ઉકેલવામાં એલસીબીને સફળતા મળી છે. લાજ લેવાના પ્રયાસ બાદ રામપુરની મહિલાએ ઘરે બોલાવી ગોળી ધરબીને હત્યા કરી હોવાનું ખુલ્યુ છે. છ વ્યક્તિઓની મદદથી મૃતદેહ રેલવે લાઇને ફેંકી દેવાયોહતો. બોરવાણી ગામના ખાયા ફળીયાના જંગલમાં રેલવે લાઇનની નજીકમાં રામપુરા ગામના મેડા ફળીયામાં રહેતા રમુડાભાઇ મનસુખભાઇ જાતે મેડા ઉવ .૪૦ વાળાને કોઇ અજાણ્યા ઇસમે શરીરે કોઇ બોથડ પદાર્થ મારી ગંભીર ઈજાઓ કરી મોઢા તથા છાતીના ભાગે તથા પેટના ભાગે કોઈ હથીયારથી ઘા કરી ગંભીર ઈજાઓ કરી મોત નિપજાવ્યુ હતું.

લાશનો નિકાલ કરવા માટે બોરવાણી ગામના ખાયા ફળીયાના જંગલમાં રેલ્વે ટ્રેકની નજીક ફેકી દઈ પુરાવાનો નાશ કરવાનો પ્રયત્ન કરાયો હતો. નાયબ પોલીસ મહાનિરીક્ષક એમ.એસ.ભરાડા, પંચમહાલ ગોધરા રેન્જ , ગોધરા નાઓની તથા મુ.પોલીસ અધિક્ષક હિતેષ જોયસરની સુચના મુજબ દાહોદ વિભાગ મે.નાયબ પોલીસ અધીક્ષક એચ.જે.બેંકર તથા દાહોદ સર્કલ પો.ઇન્સ. એચ.પી. કરેણ તથા એલ.સી.બી. પી.આઇ. બી.ડી.શાહ નાઓએ ગુનાવાળી જગ્યાની વિઝીટ કરી ગુનો શોધી કાઢી આરોપીઓને ઝડપી પાડવા સારૂ દાહોદ રૂરલ પોલીસ સ્ટેશનના સી.પો.સ.ઇ એન.એન.પરમાર તથા તથા એલ.સી.બી. પો.સ.ઇ. પી.એમ.મકવાણા તથા પેરોલ ફર્લોસ સ્કોર્ડ પો.સ.ઇ. આઇ.એ.સીસોદીયાની જુદી – જુદી ટીમોની રચના કરાઇ હતી. ગુનાની તપાસ ટેકનીકલ સોર્સથી ઝીણવણટ ભરી રીતે તપાસ કરતા સુરતાબેન વસનભાઇ રમસુભાઇ ભુરીયા ઉ.વ .૪૩રહે.રામપુરા ભુરીયા ફળીયુ ઉપર શંકા જતા તેણીએ પૂછપરછમાં ગુનાની કબૂલાત કરી લીધી હતી.

અગાઉ સુરતાબેન તથા મૃતક રમુડાભાઇ વચ્ચે ઝગડો થયો હતો.રમુડાભાઇએ તે વખતે લાજ લેવાનો પ્રયાસ કર્યો હતો. આ બાબતે તેઓના પંચો રાહે સમાધાન થયેલ અને રૂપિયા આપવાનું નક્કી કર્યુ હતું. રમુડાભાઇએ રૂપિયા આપ્યા ન હતાં. તા .૧૩ / ૦૨ / ૨૦૧૧ ના રોજ રાત્રીના આશરે આઠેક વાગ્યાના સુમારે મહીલાએ મૃતક રમુંડાભાઇને ફોન કરી પોતાના ઘરે બોલાવી દેશી હાથ બનાવટના તમંચાથી ગોળી મારી તથા અન્ય બોથડ પદાર્થ વડે હત્યા કરી નાખી હતી. અન્ય છ વ્યક્તિઓ સાથે મળીને મૃતદેહ રેલવે લાઇન પાસે નાખી દેવાયો હતો.

કોણ-કોણ શામેલ
તમંચો કારતુસ લાવી આપનાર રામપુરાના વસનભાઇ રમસુભાઇ ભુરીયા અને લાશનો નિકાલ કરવામાં રામપુરના દિનેશભાઇ ખુમસિંગભાઇ ભુરીયા, બાબુભાઇ મગનભાઇ, શંકરભાઇ રામસિંગભાઇ ભુરીયા, વસનભાઇ રમસુભાઇ ભુરીયા અને એક બાળ કિશોરીનો સમાવેશ થાય છે.