કાકાની તસવીર

દાહોદના સૈફી મહોલ્લામાં એક જ મકાનમાં ઉપર નીચે રહેતા બે ભાઇઓ વચ્ચે કચરા તથા ચઢવા ઉતરવા મુદ્દે ગુરૂવારની રાત્રે થયેલી તકરાર ઉગ્ર સ્વરૂપ પરિણમતાં એક વ્યક્તિએ છરીથી એક મહિલા સહિત બે લોકો ઉપર હુમલો કરતાં 18 વર્ષિય છોકરાનું સ્થળ ઉપર મોત નિપજ્યું હતું. આ સંદર્ભે દાહોદ તાલુકા શહેર પોલીસને જાણ કરતાં કાર્યવાહી હાથ ધરી હતી.દાહોદ શહેરના સૈફી મહોલ્લા ભોઇવાડાની ખુંટ પર એક જ મકાનમાં ઉપર નીચે રહેતા બે સગાભાઇઓ મોહમ્મદભાઇ મન્સુરી તથા શાહનવાજ મહોમંદભાઇ મન્સુરી વચ્ચે કચરા તથા ચઢવા ઉતરવા મુદ્દે અવારનવાર તકરાર થતી રહેતી હતી. જેમાં ગતરોજ ગુરૂવારની રાત્રીના સમયે પણ ઇમરાનભાઇ મન્સુરીની પત્ની ફરજાનાબેન તથા 18 વર્ષિય પુત્ર શાહનવાબઅલી બહારથી પોતાના ઘરે આવી સીડી ચઢતા હતા.

ત્યારે શાહનવાજ મન્સુરીએ ગુલ્લે થઇ મોડે સુધી શુ ચઢ ઉતર કર્યા કરો છો તેમ કહેતા બન્ને વચ્ચે ઉગ્ર બોલાચાલી થઇ હતી અને શાહનવાજ મન્સુરીએ પોતાના ભાઇની પત્ની ફરજાનાબેનને ગાળો બોલી મારી નાખવાના ઇરાદે છરી વડે જમણા હાથે ખભા પર કોણી તથા કાંડાના વચ્ચેના ભાગે તેમજ ડાબા હાથના બાવળા પર ઘા મારી જીવલેણ ઇજાઓ પહોંચાડી હતી. આ દરમિયાન માતાને છોડાવવા વચ્ચે પડેલા છોકરા શાહનવાબઅલીને ડાબા ખભાની નીચે છાતીના ભાગે છરીનો ઘા મારી દેતાં તેનું ઘટના સ્થળે કમકમાટી ભર્યુ મોત નિપજ્યું હતું.