દાહોદમાં કોરોનાના સંક્રમણના સમયે પણ બેધડક બની દુકાનોમાં મોટી સંખ્યામાં જાણ મેળાવડો જમા થવાની માહિતી મળતા જ વહીવટી તંત્ર દ્વારા આ દુકાનોમાં આકસ્મિક ધસી જઈને તે તમામ 3 દુકાનોને સીલ કરવામાં આવી હતી.

દાહોદ શહેરમાં અનેક લોકો માસ્ક અને સોશિયલ ડિસ્ટંન્સિંગના નિયમોનું છેડેચોક ઉલ્લંઘન કરતા હોવાની બુમ ઉઠવા પામી છે. ત્યારે તા.23 નવેમ્બરને સોમવારે દાહોદના ગોધરા રોડ ઉપર આવેલી હરિઓમ સ્વીટ્સ એન્ડ ફરસાણ, એમ.જી.રોડ સ્થિત નોવેલ્ટી સ્ટોર અને સ્વામી વિવેકાનંદ ચોક સ્થિત મયુર કંગન સ્ટોરમાં નિયમ કરતા વધુ ગ્રાહકોનો મેળાવડો જામ્યો હોવાની બાતમી મળતા જ વહીવટી તંત્ર દ્વારા આકસ્મિક ચેકીંગ હાથ ધરાતા લોકોમાં નાસભાગ મચી જવા પામી હતી. અધિકારીઓએ ઘટનાસ્થળે પહોંચીને આ દુકાનોને સીલ મારી દીધી હતી. આ વાત દાહોદમાં ફેલાતા આ વિસ્તારોના અન્ય દુકાનદારો પણ પોતાની દુકાનો ટપોટપ બંધ કરીને જતા રહ્યા હતા.

પ્રાંત અધિકારી એમ.એસ.ગણાસવાના વડપણ હેઠળ વહીવટી તંત્ર, આરોગ્ય તંત્ર, પાલિકા તંત્ર અને પોલીસ તંત્રની સંયુક્ત કામગીરી બાદ દુકાનો સીલ કરીને આગળની કાર્યવાહી હાથ ધરવામાં આવી છે. આ સાથે જિલ્લાના વિવિધ તાલુકાઓમાં માસ્ક નહીં પહેરવા બદલ 85 વ્યક્તિઓને કુલ રૂ. 80,700 નો દંડ વસુલ્યો હતો