સંજેલી નગરમાં બે પોઝિટિવ કેસ નોંધાતા આરોગ્ય અધિકારી માર્ગદર્શન મુજબ તેર જેટલી ટીમો બનાવી ડોર ટુ ડોર સર્વેની કામગીરી હાથ ધરવામાં આવી હતી 769 ઘરોમા સર્વેની કામગીરી દરમ્યાન બાર શંકાસ્પદ ટેસ્ટમાંથી ત્રણ પોઝિટિવ કેસ મળી આવ્યાં હતાં. શનિવારે ડોઝ લેનાર બેન્ક કર્મચારી પોઝિટિવ નોંધાતાં બેન્ક બંધ કરવી પડી હતી.

સંજેલી નગરમાં રવિવારના રોજ વેક્સીનેશનનો ડોઝ લેનાર દંપતિ પોઝિટિવ આવતા તંત્રમાં દોડધામ મચી હતી. જેને લઇ સોમવારના રોજ આરોગ્ય અધિકારીના માર્ગદર્શન મુજબ તાલુકા પ્રાથમિક આરોગ્ય કેન્દ્રના સ્ટાફ દ્વારા તેર જેટલી ટીમો બનાવી સંજેલી નગરમાં ડોર ટુ ડોર સર્વેની કામગીરી હાથ ધરવામાં આવી હતી. જેમાં કોવિડ રસીકરણ, ટીબી, લેપ્રસી જેવા રોગોની સર્વે કરવામાં આવી હતી. જેમાં કન્ટેઇનમેન્ટ માંડલી રોડ, હોળી ફળીયા, કુંભાર ફળીયું, મેન રોડ, પોસ્ટ ઓફિસ સહિતના વિસ્તારો મળી 769 જેટલા મકાન સહિત વિસ્તારોમાં સર્વેની કામગીરી દરમ્યાન બાર જેટલા શંકાસ્પદ કેસ જણાયા હતાં.

આરોગ્ય વિભાગની ટીમ દ્વારા રેપીડ ટેસ્ટ કરવામાં આવ્યો હતો જેમાં નવ નેગેટિવ કેસ નોંધાયાં હતાં. જ્યારે ત્રણ પોઝિટિવ કેસ નોંધાયા હતા. કન્ટેનમેઇન્ટ વિસ્તારમાં રવિવારના રોજ પોઝિટિવ આવેલા દંપતીના ઘરેથી ફરી બે પોઝિટિવ કેસ નોંધાયા હતા. શનિવારના રોજ વેક્સીનેશનનો પ્રથમ ડોઝ લેનાર અર્બન બેંકના કર્મચારીને પણ પોઝિટિવ નોંધાતા ઝાયડસ હોસ્પિટલમાં ખસેડવામાં આવ્યાં હતાં. આમ સોમવારનાં રોજ આરોગ્ય વિભાગની ટીમ દ્વારા ડોર ટુ ડોર સરવેની કામગીરીમાં આવી હતી. જે દરમ્યાન ડોઝ લેનાર એક બેંક કર્મચારી સહિત ગઈકાલે પોઝિટિવ આવેલા દર્દીના ઘરે ફરી બે પોઝિટિવ કેસ મળી સંજેલી નગરમાં એક સાથે ત્રણ પોઝિટિવ કેસ નોંધાતાં નગરમાં ખળભળાટ મચી જવા પામ્યો હતો.