લીમખેડાના મોટા માળના તળાવમાં ચાર કિશોરીઓ નાહવા ગઈ હતી. તેમાંથી બે કિશોરીઓ ડૂબી ગઈ હતી. જેમાં તેમને બહાર કાઢી સારવાર માટે લઇ જતા એકનું મોત થયુ હતુ. જ્યારે એકનો બચાવ થયો છે.

પાણી કેટલુ ઉંડુ છે તેની જાણ ન હોવાથી ચારેય કિશોરીઓ ડૂબવા લાગી

લીમખેડા તાલુકાના મોટા માળ ગામમાં રહેતી ચાર કિશોરીઓ તળાવમાં કપડા ધોવા ગઈ હતી. જેમાં કપડા ધોયા બાદ આ ચારેય કિશોરીઓ તળાવમાં નાહવા પડી હતી. તેમાં તળાવમાં પાણી કેટલુ ઉંડુ છે તેની જાણ ન હોવાથી ચારેય કિશોરીઓ ડૂબવા લાગી હતી. તેમાંથી બે કિશોરીઓ મહામહેનતે જાતે બહાર નીકળીને પરિવારજનોને બોલાવી લાવી હતી. ત્યારે પરિવારજનોએ ડૂબેલી બંન્ને કિશોરીઓને ગમે તેમ કરી બહાર કાઢી હતી. તથા બંનેને એમ્બ્યુલન્સ મારફતે દવાખાને લઈ જઈ સારવાર શરુ કરવામાં આવી હતી. પરંતુ તેમાથી એકનું મોત થઈ ગયુ હતુ અને સદનસીબે એક બચી ગઈ હતી. તેમજ દુર્ઘટના સંદર્ભે પોલીસે આગળની તજવીજ હાથ ધરી છે.