પ્રતીકાત્મક તસ્વીર

સીંગવડના પસાયતા ગામેથી બાઇક ઉપર દારૂની ખેપ મારતા ખેપિયાને 20,200 જથ્થા સાથે રંધીકપુર પોલીસે ઝડપી પાડ્યો હતો. ખેપિયો કેશરપુરના બુટલેગરે મંગાવેલો જથ્થો લઇને જતાં પોલીસને હાથે ઝડપાઇ ગયો હતો. જથ્થો તથા એક મોબાઇલ અને બાઇક મળી 45,700 રૂ.ના મુદ્દામાલ જપ્ત કરી બે સામે પોલીસે ગુનો નોંધ્યો હતો.

સીંગવડ પોલીસ મથકના પી.એસ.આઇ. જે.એલ.પટેલ તથા સ્ટાફ ગતરોજ પેટ્રોલીંગમાં હતા. ત્યારે જીજે-20-એજ-8846 નંબરની બાઇક ઉપર ઇંગ્લિશ દારૂ લઇને જતો હોવાની બાતમી મળી હતી. જેના આધારે ત્યારે સાંજે 7 વાગે પસાયતા ગામે પોલીસ વોચમાં ઉભી હતી.

ત્યારે બાતમી વાળી બાઇક આવતાં તેના ચાલક અંતેલા ગામના મુકેશ ધીરા પટેલને રોકી બાઇક ઉપર લાદેલા લગડાની તલાસીમાં તેમાંથી દારૂની 192 બોટલો મળી આવી હતી. તેની પુછપરછ કરતાં દારૂનો જથ્થો કેશરપુરના બુટલેગર શૈલેષ દલા પટેલ માટે લઇ જતો હોવાનું જણાવ્યું હતું.

જથ્થો, 500ની કિંમતનો એક મોબાઇલ તથા 20,000 રૂા.ની બાઇક મળી કુલ 45,700નો મુદ્દામાલ જપ્ત કરી જથ્થો મંગાવનાર બુટલેગર તથા ઝડપાયેલા ખેપિયા વિરૂદ્ધ રણધીકપુર પોલીસે ગુનો નોંધી કાર્યવાહી હાથ ધરી હતી.