દાહોદ શહેરમાં 26મી જાન્યુઆરીની રાજ્ય કક્ષાની ઉજવણી ટાંણે અસ્થાયી દબાણો દૂર થઇ જતાં રસ્તા આપોઆપ પહોળા થઇ ગયા હતાં. પર્વની પૂર્ણાહૂતિ બાદ પરીસ્થિતિ જેસે થે જોવા મળી હતી. ત્યારે આ બાબતને ગંભીરતાથી લઇને ગુરુવારે કલેક્ટર, એસ.પીની આગેવાનીમાં દબાણ હટાવ ઝુંબેશ હાથ ધરવામાં આવી હતી. તેમાં સ્ટેશન રોડ, ઠક્કર ફળિયા વિસ્તારમાંથી દબાણો દૂર કરવામાં આવ્યા હતાં.

દાહોદ શહેરમાં ગુરુવારે કલેક્ટર વિજય ખરાડી, એસ.પી. હિતેશ જોયસર શહેરમાં નીરીક્ષણ માટે નીકળ્યા હતાં. ત્યારે સ્ટેશન રોડ ઉપર અસ્થાયી દબાણો ફરીથી થયેલા જોવા મળ્યા હતાં. જેથી દાહોદ શહેર પોલીસ અને નગર પાલિકાની ટીમ આ દબાણો દૂર કરવા માટે વિસ્તારમાં ફરી વળી હતી. તંત્રને ફરી સક્રિય જોઇને દબાણ કરનારા કેટલાંક લોકો પોતાની રીતે જ કામે લાગી ગયા હતા.