દાહોદ પંથકમાં સવારે અને રાત્રે ઠંડી પડી રહી હોવાથી મિશ્ર ઋતુની અનૂભુતિ થઇ રહી છે.તેવા સમયે ગુરુવારે બપોંરે ગ્રામ્ય વિસ્તારમાં કરા સાથે વરસાદ પડતા ચારે કોર ઠંડક છવાઇ ગઇ હતી.મધ્ય ગુજરાત માટે કોઇ આગાહી ન હોવા છતાં એકાએક જ વાતાવરણમાં પલ્ટો આવતાં આશ્ચર્ય સર્જાયુ હતુ.

દાહાદ પંથકમાં રવી ઋતુની પૂર્ણાહુતિ સાથે હાલમાં ઘઉં અને ચણાંનો પાક તૈયાર છે.બીજી તરફ જિલ્લામાં ગરમી અને ઠંડીનુ બેવડું વાતાવરણ છેલ્લા કેટલાક દિવસોથી અનુભવાઇ રહ્યુ છે.વહેલી સવારે અને સાંજથી ઠંડી પડી રહી છે જ્યારે બપોરના સમયે ગરમી લાગી રહી છે.આમ બેવડી ઋતુ અનુભવાઇ રહી છે.બીજી તરફ હવામાન વિભાગે ત્રણેક દિવસ અગાઉ દક્ષિણ ગુજરાતમાં કમોસમી માવઠું થવાની આગાહી કરવામાં આવી હતી. પરંતુ મધ્ય ગુજરાતમાં આવો કોઇ વરસાદ થવાની લગીરે સંભાવના જણાતી ન હતી. તેમ છતાં ગુરુવારે બપોરે 2:23 વાગ્યાના અરસામાં દાહોદ પંથકના પૂર્વ પટ્ટી વિસ્તારમાં એકાએક જ વાદળછાયા વાતાવરણ વચ્ચે વરસાદ વરસવા માંડ્યો હતો.

વરસાદ સાથે કરા પડતાં સ્થાનિકોમાં ભારે આશ્ચર્ય સર્જાયુ હતુ.દાહોદ શહેરમાં પણ વાદળો ગરજવા માંડતા ચોમાસુ માહોલ સર્જાયો હતો. કારણ કે પંથકમાં ગમે ત્યારે ધોધમાર વરસાદ વરસે છે પરંતુ કરા પડવાની ઘટના અસામાન્ય છે.હાલમાં કોરોનાનો ભય ઓસરી રહ્યો હોવાથી નાગરિકો થોડી બેદરકારી પણ રાખી રહ્યા છે તેવા સમયે જ હવામાન બદલાઈ જતાં ટાઢક છવાઈ જવાને કારણે ઋતુજન્ય રોગો સાથે કોરોનાનો ભય પણ વધી રહ્યો છે.