ગોડાઉનમા પડેલા વાયરોમાં એકાએક આગ લાગી

ઝાલોદમાં એમજીવીસીએલની કચેરી પાછળ આવેલા ગોડાઉનમા પડેલા વાયરોમા આજે બપોરે એકાએક આગ ફાટી નીકળી હતી. જેથી ધુમાડાના ગોટે ગોટા ઉઠયા હતા. તાત્કાલિક ફાયર બ્રિગેડને બોલાવતા આગ બુઝાવવાની કામગીરી હાથ ધરવામા આવી હતી.

ઝાલોદ નગરમા આવેલી એમજીવીસીએલની કચેરી પાછળ જ આ વિભાગનુ ગોડાઉન આવેલુ છે. આ ગોડાઉનમા વીજ વિભાગના વાયરો પડેલા છે. આ વાયરોમા મંગળવારે અચાનક જ આગ ફાટી નીકળી હતી. આગને કારણે ઉઠેલા ધુમાડાના ગોટા ઉઠવા માડતા નગરજનોમા પહેલા કુતુહલ સર્જાયુ હતુ, પરંતુ વીજ કચેરીમા આગ લાગી હોવાની જાણ થતા નગરમા ભય ફેલાઈ ગયો હતો.

તાત્કાલિક ફાયર ફાઈટરને બોલાવી લેવાતા સત્વરે આગ બુઝાવવાની કામગીરી શરુ કરવામા આવી હતી. આગને કારણે કોઈ જાનહાનિ ન થઈ હતી. તેમજ કોઈને ઇજા ન થઇ હોવાનુ જાણવા મળયુ છે. અન્ય કોઇ હોનારત ન થાય તેના માટે વીજ પુરવઠો બંધ કરવામા આવ્યો હતો તેમ આ વિભાગના અધિકારી વી.કે.સોનીએ જણાવ્યુ હતુ.