પીપલોદ બજારમાં મોટર સાયકલની આગળ કુતરુ આવી જતાં પટકાયેલા એકનું મોત નિપજ્યું હતું. જ્યારે એક યુવક ઘાયલ થયો હતો. દેવગઢ બારિયા તાલુકાના સાલીયા ગામના બળવંતભાઇ પારસીંગ પટેલ તથા ચંદ્રસીંગ બલુભાઇ પટેલ બન્ને જણા જીજે-20-એઆર-0318 નંબરની મોટર સાયકલ પીપલોદ બજારમા કામ પતાવી પરત ઘરે આવતાં હતા. તે દરમિયાન સાંજના સમયે પીપલોદ બજારમાં અચાનક એક કૂતરુ આવી જતાં મોટર સાયકલ સ્લીપ ખાઇ જતાં સર્જાયેલા અકસ્માતમાં બળવંતભાઇને માથાના ભાગે ગંભીર ઇજાઓ થતા ઘટના સ્થળે મોત નિપજ્યું હતું. જ્યારે ચન્દ્રસીંગને શરીરે ઇજાઓ થઇ હતી.

અકસ્માત સર્જાતા લોકટોળા ભેગા થઇ ગયા હતા અને 108ને જાણ કરી બન્ને ઇજાગ્રસ્તોને પીપલોદ સરકારી દવાખાને લઇ ગયા હતા. જ્યાર હાજર ડોક્ટરે બળવંતભાઇ પારસીંગ પટેલને મૃત ઘોષિત કર્યો હતો. આ સંદર્ભે મુળાભાઇ ગમજીભાઇ પટેલે દેવગઢ બારિયા પોલીસ મથકે ફરિયાદ નોંધાવી હતી.