ફાઇલ તસવીર

દાહોદ જિલ્લામાં વધી રહેલા કોરોનાના કેસોને પગલે દર્દીઓને રાજ્ય સરકાર દ્વારા અપાઇ રહેલી આરોગ્ય સુવિધાની જાતમાહિતી મેળવવા માટે મુખ્યમંત્રી વિજય રૂપાણી 20ના રોજ દાહોદ આવી રહ્યા છે. દાહોદ જિલ્લામાં કોરોના સંક્રમિતોની સારવાર માટે વધારાયેલા બેડ ઉપરાંત આ વાઇરસને રોકવા જિ.વહીવટી તંત્ર દ્વારા થઇ રહેલી કામગીરી સંદર્ભે રૂપાણી કલેક્ટર કચેરી ખાતે રાજ્ય તથા જિલ્લાના વરિષ્ઠ અધિકારીઓ સાથે બેઠક યોજી જરૂરી માર્ગદર્શન આપશે.

જોકે, જિલ્લામાં વ્યાપક રીતે પ્રસરેલા કોરોના સંક્રમણને કારણે રોજ 50થી વધુ પોઝિટિવ કેસ આવી રહ્યા હોવાથી શહેરની 21, ઝાલોદ 3 અને બારિયાની 1 હોસ્પિટલને કોવિડ હોસ્પિટલ તરીકે જાહેર કર્યા છતાં 662 બેડમાંથી સોમવારે 73 જ ખાલી મળ્યા હતાં. કોવિડ માટે સૌથી મોટી ગણાતી ઝાયડસમાં 321માંથી માત્ર 77 જ બેડ સોમવારે ખાલી હતાં. અહીં દાખલ 244માંથી 240 દર્દી તો ઓક્સિજન પર છે. બીજી તરફ ખાનગી દવાખાનામાં ખાટલા તો છે પરંતુ સાધનોના અભાવથી તબીબોનો પનો ટૂંકો પડી રહ્યો છે.

માત્ર એ-સિમ્ટોમેટિક કે ઓછા લક્ષણોવાળા દર્દી જ દાખલ કરવાની તેમની મજબૂરી છે. અધુરામાં પુરુ ઝાયડસ અને ખાનગી દવાખાનામાં આશરે 30 ટકા દર્દીઓ તો એમપી અને રાજસ્થાનના છે. પરિસ્થિતિ હજી વિકટ થવાની સંભાવના છે ત્યારે મુખ્યમંત્રી આ બાબતે વિચારે તે જરૂરી છે.

આટલું થાય તો પણ થોડીક રાહત થાય
ભીડ ટાળવા વધુ ટેસ્ટિંગ સેન્ટર શરૂ કરવા જોઇએ
કોરોના વિશે દર્દીના સગાને માર્ગદર્શન મળે તે માટે કાઉન્સિલરોની નિમણૂક
મરણ આંક ઘટે તે માટેના કોઇ કારગર ઉપાય જરૂરી
હોસ્પિટલો સિવાય શાળાને પણ હાલની સ્થિતિ મુજબ કોવિડ હોસ્પિટલમાં ફેરવવી જોઇએ