દાહોદ જિલ્લાના દેવગઢ બારીયા તાલુકાના ભથવાડા ટોલનાકા પાસેથી પોલીસે એક વૈભવી ફોર વ્હીલર ગાડીમાં વિદેશી દારૂની હેરાફેરી કરતાં બે ઈસમોને ઝડપી પાડવામા આવ્યા છે. ગાડીમાંથી કુલ રૂ. 2 લાખ 12 હજાર 160નો વિદેશી દારૂ અને વાહન મળી કુલ રૂ. 5 લાખ 14 હજાર 160નો મુદ્દામાલ જપ્ત કરવામા આવ્યો છે.

દેવગઢ બારીયા પોલીસ મળેલી બાતમીના આધારે ભથવાડા ટોલનાકા પાસેથી વોચ ગોઠવી ઉભી હતી. આ દરમિયાન બાતમીમાં પ્રમાણેની એક વૈભવી ગાડી ત્યાંથી પસાર થતાં પોલીસે તેને ઉભી રખાવી હતી અને ગાડીમાં સવાર લાખન અભયસિંહ ખરાડે (રહે.ધાર, મધ્યપ્રદેશ) અને આનંદ રામચંદ્ર ધનાવડે (રહે. વડોદરા) બંન્નેની અટકાયત કરી પુછપરછ કરતાં પોલીસને સંતોષકારક જવાબ મળ્યો ન હતો.

ત્યારબાદ પોલીસે તેમની ગાડીની તલાસી લેતાં પોલીસ ચોંકી ઉઠી હતી. કારણ કે ગાડીમાંથી વિદેશી દારૂની બોટલો નંગ. 1248 જેની કિંમત રૂ. 2 લાખ 12 હજાર 160ના જથ્થા સાથે ગાડી, મોબાઈલ ફોન વિગેરે મળી કુલ રૂ. 5 લાખ 14 હજાર 160નો મુદ્દામાલ દેવગઢ બારીયા પોલીસે કબ્જે કરી ઉપરોક્ત ઝડપાયેલ બંન્ને ઈસમો વિરૂધ્ધ ગુનો નોંધી કાયદેસરની કાર્યવાહી હાથ ધરી છે.