પ્રતીકાત્મક તસ્વીર

ગત વર્ષે તા.10.7.20ની સરખામણીએ આ વર્ષે તા.10.7.21 સુધીમાં દાહોદ જિલ્લામાં 2.66 % ઓછો વરસાદ નોંધાયો છે. ગત વર્ષે તા.10 સુધીમાં જિલ્લાના નવ તાલુકાઓમાં સરેરાશ વરસેલા 9.80 % વરસાદની સામે આ વર્ષે સરેરાશ 7.14 % વરસાદ નોંધાયો છે. જિલ્લાના દાહોદ તાલુકામાં તા.10 જુલાઈ 19 ના રોજ 282 મીમી અને ગત વર્ષે તા.10.7.20 સુધીમાં વરસી ચુકેલા 164 મીમી વરસાદની સામે આ વર્ષે દાહોદ તાલુકામાં માત્ર 53 મીમી વરસાદ જ નોંધાયો છે.

આ વર્ષે ફતેપુરા, સીંગવડ, લીમખેડા અને તાલુકાઓમાં ગત વર્ષની સરખામણીએ આ દિવસ પર્યંત બરાબરીનો અથવા વધુ વરસાદ વરસી ચુક્યો છે તો દાહોદ સહિત દેવગઢ બારીયા, ગરબાડા, ધાનપુર, સંજેલી અને ઝાલોદ તાલુકાઓમાં ગત વર્ષની સરખામણીએ ઓછો વરસાદ છે. દાહોદ તાલુકા સહિત સમગ્ર જિલ્લાના અનેક તાલુકાઓમાં આરંભિક વરસાદ બાદ વાવેતર થઇ ચુક્યું છે ત્યારે વરસાદ લંબાતા ખેતરોમાં કાતરા સહિતની જીવાતો ઉત્પન્ન થઇ ચુકતા વાવેતર નિષ્ફળ નીવડવાની ભીતિ છે. હજુય વરસાદનું સમયસર આગમન થાય તો વાવેતર બચી શકે તેમ છે તેમ જાણવા મળ્યું છે.

​​​​​​​