પ્રતિકારત્મક તસ્વીર

દાહોદ નગર પાલિકાની ચૂંટણી માટે ભાજપના ઉમેદવારોની સૂચિ ગુરુવારે પ્રકાશિત થતા જ ‘કહીં ખુશી, કહીં ગમ’ના દ્રશ્યો સર્જાયા હતા. ભાજપ તરફથી દાવેદારી કરી ચુકેલા 161 લોકો પૈકી જે 36 ના નામ અંતિમ સૂચિમાં જાહેર થયા હતા. તે સિવાયના 125 લોકો પૈકી મહત્તમ લોકોએ ચુપકીદી સાધી પક્ષના નિર્ણયને શિરોમાન્ય રાખ્યો હતો પરંતુ, કેટલાંકે વર્ષો સુધી પક્ષ માટે પોતે કરેલી મહેનતનું ફળ નહીં મળતા બળવો કરી અન્ય પક્ષ કે અપક્ષ તરીકે ઝંપલાવવાની ચળવળનો ગણગણાટ સાંભળવા મળ્યો હતો.

દાહોદ નગર પાલિકાની 9 વોર્ડની ભાજપની સૂચિ ગુરુવારની મોડી સાંજે પ્રકાશિત કરવામાં આવી હતી. સૂચિમાં પોતાનું નામ નહીં હોઈ અનેક લોકોની આંખમાં ઝળઝળિયાં આવી ગયા હતા તો અમુકે મર્યાદા તોડી પક્ષથી છેડો ફાડી ખુલ્લેઆમ અપક્ષ, કોંગ્રેસ કે આમ આદમી પાર્ટીના ઉમેદવાર તરીકે ચૂંટણી લડવાની મક્કમતા દર્શાવી હોવાનો ગણગણાટ સાંભળવા મળ્યો હતો. જોકે, તેની સામે ભાજપે પણ ડેમેજ કંટ્રોલ માટેની કવાયત હાથ ધરી હોવાનું જાણવા મળ્યુ હતું.

ભાજપ તરફથી જાહેર થયેલ સૂચિમાંદર્શાવેલ ઉમેદવારો

ભાજપની બેઠક ઉપર પ્રથમ વારચૂંટણી લડતા નવા ચહેરા

ગત ટર્મના કોની ટિકિટ કપાઈ ?
ગત ટર્મના 23 વિજેતાઓ પૈકી અભિષેક મેડા, પ્રશાંત દેસાઈ, ગુલશન બચાની, કુણાલ બામણીયા, સંયુક્તાબેન મોદી અને સલમાબેન આંબાવાલા સિવાયના 17 કાઉન્સિલરોએ આ વખતે પણ પુન: દાવેદારી નોંધાવી હતી. જે પૈકી 12 લોકોની દાવેદારી, ઉમેદવારીમાં પરિણમવામાં નિષ્ફળ રહી હતી. ગત ટર્મના માત્ર પાંચ જ લોકોને ટીકીટ મળતા બાકીના અરવિંદ ચોપડા, કાઇદ ચુનાવાલા, વિનોદ રાજગોર, રાજુ પરમાર, બિરજુ ભગત, યુસુફ રાણાપુરવાલા, મુકેશ ખંડેલવાલ, લતાબેન સોલંકી, કલ્પનાબેન ભગત, રમીલાબેન બારિયા, કલાવતીબેન પરમાર, પુષ્પાબેન ઠાકુર વગેરે 12 લોકોને નિરાશા સાંપડી હતી.

જાહેર થયેલામાંથી કોના છેડા ક્યાં અડે છે
ભાજપના ઉમેદવાર તરીકે જાહેર થયેલા સંતોષબેન ગત ટર્મના કાઉ. મુકેશ ખંડેલવાલના પત્ની છે. તો કિંજલબેન પરમાર ગત ટર્મના કાઉ. કલાવતીબેન પરમારના પુત્રવધુ છે. રાજેશ સહેતાઇ પૂર્વ પાલિકા પ્રમુખ છે. શ્રદ્ધા ભડંગ પૂર્વ પ્રમુખ નલીનકાંત મોઢીયાના પૂત્રી છે. અલીઅસગર ચુનાવાલા પૂર્વ કાઉ. કાઇદ ચુનાવાલાના કાકાના દીકરા છે. ભાવનાબેન વ્યાસ રીપીટ કરાયા છે પરંતુ તેઓ ભાજપ પ્રમુખ મનોજ વ્યાસના પત્ની છે. પ્રીતીબેન સોલંકી રીપીટ કરાયા છે પરંતુ શહેર ભાજપ મંત્રી સત્યેન્દ્રસિંહ સોલંકીના પત્ની છે. રીનાબેન પંચાલ રીપીટ છે પરંતુ જિલ્લા ભાજપ ઉપપ્રમુખ ધમુ પંચાલના પત્ની છે.

યુવાનોને વધુ ફાળવણીથી યુવાવર્ગમાં ખુશાલી
દાહોદ શહેરના તમામ વોર્ડમાંથી મોટાભાગે યુવાવર્ગને ટીકીટ ફાળવવામાં આવી હોઈ શહેરના યુવાન-યુવતીઓમાં હર્ષની લાગણી વ્યાપી જવા પામી હતી. ઉચ્ચ અભ્યાસના ભાથા સાથે આધુનિક ટેકનોલોજીથી માહિતગાર યુવાનો પોતાની આગવી દ્રષ્ટિથી શહેરના વિકાસમાં વધુ સારું પ્રદાન કરી શકશે તેવી પણ આશા જન્મી છે.

કોંગ્રસમાંથી આવેલ બેને ટિકિટ મળી
કોંગ્રેસથી છેડો ફાડીના ભાજપમાં ગણતરીના દિવસો પહેલાં જ પ્રવેશ કરનારા કોંગ્રેસમાં ગત ટર્મમાં કાઉન્સિલર રહી ચુકેલા માસુમા ગરબાડાવાલા અને કોંગ્રેસ મહિલા અગ્રણી ચંદ્રકાંતાબેન ધાનકાને પણ વોર્ડ નંબર 1 અને 9માં ટિકિટ આપવામાં આવી છે.

વય કે ટર્મ મર્યાદા, અન્ય કારણોસર કોણ કપાયા
આ વખતે દાવેદારી કરનારા પૈકી જેમના નામ જાહેર નથી થયા તેવા અરવિંદ ચોપડા, કાઇદ ચુનાવાલા, પુષ્પાબેન ઠાકુર, કલાવતીબેન પરમાર, લતાબેન સોલંકી સહિતના અનેક લોકોને વય, ત્રણ ટર્મ કે અન્ય કારણોસર નામ જાહેર નહીં થતા જાણ્યે-અજાણ્યે તેમની રાજકીય કારકિર્દી ઉપર પૂર્ણવિરામ લાગી જશે કે શું તેવી ચર્ચાઓ પણ શહેરમાં સાંભળવા મળી હતી.