ઝાલોદ પાલિકાના ભાજપના કાઉન્સિલર હિરેન પટેલની હત્યામાં પોલીસે કુલ છ જેટલા આરોપીની ધરપકડ કરાઈ હતી. જેમાં આ કેસમાં ઇમરાન ગુડાલાની એટીએસ દ્વારા હરિયાણાથી ધરપકડ કરાયા બાદ એટીએસની તપાસમાં પૂર્વ સાંસદ બાબુભાઇ કટારા અને ધારાસભ્ય ભાવેશ કટારાના ભાઈ અમિત કટારાના ઈશારે હિરેન પટેલની હત્યા કરાઇ હોવાનું બહાર આવતા દાહોદ એલસીબી દ્વારા ચિત્રોડિયા ખાતેથી અમિત કટારાની ધરપકડ કરતા જિલ્લાનું રાજકારણમાં ગરમાવો જોવા મળ્યો હતો.

પોલીસે અમિત કટારાનો કોરોના ટેસ્ટનો રિપોર્ટ નેગેટિવ આવતા ધરપકડ કરીને ઝાલોદ કોર્ટ ખાતે શુક્રવારના દિવસે હાજર કરવામાં આવ્યો હતો. જેમાં ઝાલોદ કોર્ટ દ્વારા અમિત કટારાના વધુ તપાસ માટે પાંચ દિવસના રિમાન્ડ મંજુર કર્યા હતા. અમિત કટારાની ધરપકડ થતા જ નગરમાં કોંગ્રેસ દ્વારા રેલી કાઢવામાં આવતા નગરમાં આપઘાત પ્રકરણમાં પોલીસ દ્વારા તેના મોબાઈલ દ્વારા કોને ધમકી આપી તે તપાસ કરાતી નથી અને હિરેન પટેલ હત્યા કેશમાં રાજકિય કિન્નાખોરી રાજકીય કારકિર્દી પુરી કરવા માટે અમિત કટારાનું નામ આ કેશમાં નાખવામાં આવ્યું હોવાના આક્ષેપ કરવામાં આવ્યા હતા અને આ હત્યામાં પોલીસ દ્વારા અન્ય કારણોની પણ તપાસ કરવા માંગ કરાઈ હતી.