દાહોદ તાલુકાના ગલાલીયાવાડ ખાતે જમીન સંબંધિ અદાવત રાખીને ટોળાએ બે મહિલા સહિત ચાર લોકો ઉપર હુમલો કર્યો હતો. આ બનાવ અંગે દાહોદ તાલુકા પોલીસે ગુનો દાખલ કરીને કાયદેસરની કાર્યવાહી હાથ ધરી છે. દાહોદના ધુળાભાઈ પુંજાભાઈ માળી, દાહોદના આંગણીયા ગામે રહેતા વિજયભાઈ રાઠી, ગલાલીયાવાડ ગામે રહેતા શૈલેષભાઈ સોમાભાઈ પસાયા અને ઝુઝરભાઈ રાણાપુરવાળા તથા તેમની સાથે બીજા દશેક જેટલા વ્યક્તિઓએ 23 જાન્યુઆરીના રોજ જમીન સબંધિ અદાવતમાં મંડળી બનાવી હતી. ગલાલીયાવાડ ગામે ગારી ફળિયામાં જઇને જેઠીબેન ગારીના ઘરે જઇ ગાળાગાળી કરી હતી.

ફળિયામાં આવેલ રેવન્યુ સર્વે નંબર 878વાળી જમીનમાં અમો બાંધકામ કરવાના છીએ. તમારાથી જે થાય તે કરી લો, તેમ કહ્યુ હતું. જેથી જેઠીબેન અને તેમના પરિવારના લોકોએ આ જમીનનો કેસ કલેક્ટર ઓફિસમાં પેન્ડીંગ છે, તેમ છતાં બાંધકામ કરવા કેમ આવ્યાં છો જણાવ્યુ હતું. જેથી ટોળાએ હુમલો કરીને શૈલેષભાઈ સોમાભાઈ પસાયાને લોખંડની પાઈપ વડે, કલ્પેશભાઈને બરડાના પાછળના ભાગે, જેઠીબેનને, સુરતીબેનને તથા રસલિબેનને ગડદાપાટુનો માર મારીને ઇજાઓ કરી હતી. આ બનાવ અંગે ઘાયલ જેઠીબેન ગારીની ફરિયાદના આધારે દાહોદ તાલુકા પોલીસે ગુનો દાખલ કરીને કાર્યવાહી હાથ ધરી છે.