પ્રતીકાત્મક તસ્વીર

ગુરૂવારના રોજ ખાણ અને ખનીજ વિભાગ દ્વારા રામપુરા પાસેથી રેતી ભરેલ ત્રણ ટ્રકો પકડી પાડ્યા બાદ ત્રણે ટ્રકોના માલિકોએ ખાણ અને ખનીજ વિભાગના કર્મચારીઓને ધાકધમકીઓ આપી સરકારી ફરજમાં અડચણ ઉભી કરી ત્રણેય ટ્રકો લઇ ભાગી ગયા હતા.પ્રાપ્ત વિગત અનુસાર દાહોદ ગોવિંદગર ત્રિમુર્તિ સોસાયટીમાં રહેતા અને દાહોદ ખાણ અને ખનીજ વિભાગમાં નોકરી કરતાં રાજુભાઇ ખીમાભાઇ ગોજીયા અને તેમની સાથેના કર્મચારીઓની ટીમ ગુરૂવારના રોજ બપોરના સમયે દાહોદ તાલુકાના રામપુરા ગામે આવેલી ક્વોરી પાસેથી ગેરકાયદે રીતે ખનીજનું ખનન, વહન તેમજ સંગ્રહ અંગેની તપાસ કરી રહ્યા હતા.

તે દરમિયાન જીજે-20-એક્સ-5154, જીજે-20-એક્સ-0172 તેમજ જીજે-20-એક્સ-8114 નંબરની રેતી ભરેલી ટ્રકોના ચાલકો ખાણ ખનીજ વિભાગની ટીમને જોઇ ટ્રકો મુકી ભાગી ગયા હતા. ત્યાર બાદ ટ્રકોના માલિકોએ ખાણ અને ખનિજ વિભાગના કર્મચારી પાસે આવી તમે અમારી ટ્રકો ખોટી રીતે પકડી છે તમે અહીથી જતા રહો તેમજ માર મારવાની ધમકીઓ આપી હતી.

સરકારી કાયદેસરની કાર્યવાહીમાં અડચણ કરી મારવાની ધમકીઓ આપી તકરાર કરી ત્રણેય ટ્રકો લઇ ભાગી ગયા હતા. આ સંબંધે ખાણ ખનીજ વિભાગના રાજુભાઇ ખીમાભાઇ ગોજીયાએ દાહોદ તાલુકા પોલીસ મથકે ત્રણેય ટ્રકોના માલિક તથા ડ્રાઇવરો વિરૂદ્ધ ગુજરાત મિનરલ પ્રવેન્સન ઓફ ઇલીગલ માઇનીંગ ટ્રાન્સપોર્ટેશન એન્જડ સ્ટોરેજ ટુલ્સ 2017ના નિયમ 3 મુજબનો ભંગ કર્યાનો ગુનો નોંધાવતાં પોલીસે ગુનો નોંધી આગળની કાર્યવાહી હાથ ધરી હતી.