• પાલ્લી-ચીલાકોટામાં 23880ના મુદ્દામાલ સાથે 2 બહેનો સહિત 4ની ધરપકડ

દિવ્ય ભાસ્કર

Aug 10, 2020, 04:00 AM IST

દાહોદ. લીમખેડા પોલીસ મથકનો સ્ટાફ બીટ વિસ્તારમાં પેટ્રોલીંગ દરમિયાન મળેલી બાતમીના આધારે દાતીયા તરફથી આવતી જીજે-20-એએલ-5619 નંબરની બાઇકના ચાલક ગરબાડા તાલુકાના ઝરીખરેલીના રાકેશ નાગદાસ ગણાવાને રોકી બાઇક ઉપર લાદેલા થેલાની તલાસી લેતા તેમાંથી વિદેશી દારૂના કાચના તથા પ્લાસ્ટીકના ક્વાટર કુલ 96 નંગ જેની કિંમત 8880ના મળી આવ્યા હતા. દારૂ સહિત 15,000 કિંમતની બાઇક મળી કુલ 23,880 રૂપિયાના મુદ્દામાલ સાથે રાકેશ ગણાવાની ધરપકડ કરી હતી.

તેમજ પાલ્લી રેલવે ફાટક પાસે બે બહેનો મીણીયા થેલામાં વિદે્શી દારૂ ભરી બસની રાહ જોઇ ઉભી હોવાની બાતમી મળતાં લીમખેડા પોલીસના મહિલા પોલીસ સહિત સ્ટાફે બાતમી વાળી જગ્યાએ જઇ રોડની બાજુમાં ઉભેલી દાભડા ગામની સુકલીબેન છગનભાઇ ડામોર, ખડદા ગામની વનીતાબેન નરેશભાઇ ડામોરને ઝડપી પાડી હતી. થેલાની તલાસી લેતા તેમાંથી વિદેશી દારૂની પ્લાસ્ટીકની બોટલો નંગ 84 જેની કિંમત 8820ની મળી આવી હતી. દેવગઢ બારિયા તાલુકાના ફુલપુરા ગામે પોલીસની ગાડી જોઇ હેરાફેરી કરતા દારૂ ભરેલી જીપ મુકી ડ્રાઇવર ભાગી ગયો હતો. પોલીસે જીપમાં તલાસી લેતાં તેમાંથી વિદેશી દારૂ તથા બિયરની પેટીઓ નંગ 13 જેમાં કુલ 456 બોટલો જેની કિંમત 56,760ની મળી આવી હતી. દારૂ તથા 2,00,000 કિંમતની જીપ મળી કુલ 2,56,760નો મુદ્દામાલ જપ્ત કરી સાગટાળા પોલીસે ભાગી ગયેલા ચાલક વિરૂદ્ધ ગુનો નોંધી કાર્યવાહી હાથ ધરી છે.