દેવગઢ બારિયા નગરપાલિકાની આગામી ૨૧મીએ યોજાનાર પ્રમુખ-ઉપપ્રમુખની ચૂંટણીમાં નવો વળાંક આવ્યો છે. જિલ્લા ભાજપના નેતાએ તમામ 22 ભાજપી કાઉન્સિલરોને ભેગાં કરી પાર્ટીનો મેન્ડેટ માથે ચડાવવાનો આદેશ કરતાં પ્રમુખ-ઉપપ્રમુખના દાવેદારો સહિત રાજકીય આગેવાનોમાં સોંપો પડી ગયો છે. છેલ્લા એક માસથી પ્રમુખ-ઉપપ્રમુખ માટેની રાજકીય ખેંચતાણને પગલે જિલ્લા ભાજપ દ્વારા માસ્ટર પ્લાન ખેલાયો હોવાની ચર્ચાઓ છે. તે સાથે આગામી મુદત માટે પ્રમુખ-ઉપપ્રમુખનો તાજ કોને મળશે તેના પર સસ્પેન્સ યથાવત રહેવા પામ્યું છે.

દે.બારિયા પાલિકાના પ્રમુખ-ઉપપ્રમુખની ચૂંટણીની તારીખ જેમ જેમ નજીક આવતી જાય છે તેમ તેમ રાજકીય જોડતોડ અને જૂથબંધી ચરમસીમાએ પહોંચી છે. પ્રમુખ-ઉપપ્રમુખ પદના દાવેદારો દ્વારા રાજકીય લોબિંગ શરૂ કરી દેવાયું છે. કેટલાક રાજકીય ગોડફાધરોના શરણે પણ ગયા હતા. ભાજપી અને આયાતી ભાજપી પ્રમુખ-ઉપપ્રમુખનો મુદ્દો પણ ગરમાયો હતો. રાજ્ય ભાજપ પાર્ટી પ્રમુખ સી.આર.પાટીલને પણ સ્થાનિક ભાજપી આગેવાનો દ્વારા લેખિત રજૂઆત કરી હતી. આ તમામ ઘટનાક્રમ અને રાજકીય પેંતરાબાજી વચ્ચે દાહોદ જિલ્લા ભાજપના નેતાએ 22 ભાજપી કાઉન્સિલરોની મિટિંગ કરી હતી. જેમાં ભાજપ પાર્ટીની ગાઈડલાઈન જણાવવામાં આવી હોવાના સમાચાર છે. ભાજપ હાઇકમાન્ડ દ્વારા પ્રમુખ- ઉપપ્રમુખ માટે જેને મેન્ડેટ આપવામાં આવે તે માથે ચડાવવાનો આદેશ કરાયો હતો.

0