દેવગઢ બારિયા તાલુકાના ટાવર શેરીમાં રહેતા એક વ્યક્તિએ ધાનપુરના કોંગ્રેસના નેતાએ સરકારી અનાજનો મોટો જથ્થો સરકારમાં ટેકાના ભાવે વેચવાનું કૌભાંડ ફેસબુક ઉપર પોસ્ટ મુકતા તેને ફોન કરી ગાળાગાળી કરી અપશબ્દો બોલી જાનથી મારી નાખવાની ધમકી આપતાં ધાનપુરના એક વ્યક્તિ સામે પોલીસ ફરિયાદ નોંધાવી હતી.

પ્રાપ્ત માહિતી અનુસાર, દેવગઢ બારિયાના ટાવર શેરીમાં રહેતા નિલેશભાઇ ફુલસીંગભાઇ ચૌહાણ તા.1 ડિસેમ્બરના રોજ પત્ની ગીતાબેન સાથે ઘરે હતા. ત્યારે રાત્રીના 9.15 વાગ્યાના અરસામાં ધાનપુર તાલુકાના લખણાગોજીયાના ભરતભાઇ વાખળાએ તેના મોબાઇલ ફોન નંબરથી નિલેશભાઇને ફોન કરી ગાળો બોલી અપશબ્દ બોલી દાદાગીરી અને તામસીપણુ બતાવી જોવા જેવી થશે અને મજા નહી આવે તુ તારા માપમાં રહેજે તુ ફેસબુક ઉપર પોષ્ટ કેમ મુકી કહેતાં નિલેશભાઇએ જણાવેલ કે સાચી હકીકત છે તે લખેલ છે.

જેમાં ધાનપુર તાલુકાના કોંગ્રેસના નેતાએ પોતે ખરીદેલ અનાજનો મોટો જથ્થો સરકારમાં ટેકાના ભાવે વેચવાનું કૌભાંડ કર્યુ છે અને સાચા ખેડૂતોને અન્યાય થઇ રહેલો છે. જેથી ભરતભાઇ વાખળા કહેવા લાગ્યો કે ભાજપના નેતાનું નામ લખ અને કોંગ્રેસનો ભ્રષ્ટાચાર દેખાય છે તેમ કહી ગાળો બોલી પરોક્ષ રીતે જાનથી મારવાની ધમકીઓ આપી હતી. નિલેશભાઇ ફુલસીંગભાઇ ચૌહાણે દેવગઢ બારિયા પોલીસ મથકે ભરત વાખળા વિરૂદ્ધ ફરિયાદ નોંધાવતાં પોલીસે કાર્યવાહી હાથ ધરી હતી.