દાહોદ શહેરના પરેલ વિસ્તારમાં આવેલી પોસ્ટ ઓફિસ તેમજ ગેસ એજન્સીના ગોડાઉનના તાળા તોડી તસ્કરોએ ચોરી કરવાનો પ્રયાસ કર્યો હતો, પરંતુ તેમના હાથે કંઇ લાગ્યુ ન હતુ. જ્યારે મામલતદાર કચેરીના પ્રાંગણમાં મુકેલી એક બાઇક ચોરાઇ ગઇ હતી. બંન્ને ઘટનાઓ સંદર્ભે પોલીસે ગુના નોંધી તપાસ હાથ ધરી છે.

દાહોદ શહેર પોલીસ મથકની હદમાં પરેલ વિસ્તારનો પણ સમાવેશ છે. આ રેલવે વિસ્તારમાં સરકારી પોસ્ટ ઓફિસ તેમજ ઇન્ડિયન ઓઇલની એક ગેસ એજન્સીનુ ગોડાઉન આવેલુ છે. ગત રાત્રે આ પોસ્ટ ઓફિસ તેમજ ગેસ એજન્સીના ગોડાઉનના તાળાં તોડી તસ્કરોએ ચોરીનો પ્રયાસ કર્યો હતો પરંતુ બંન્ને સ્થળેથી તસ્કરોને કશું જ મળ્યુ ન હતુ. પોસ્ટ ઓફિસમાં તો તિજોરીનુ તાળુ તોડવાનો પ્રયાસ પણ તસ્કરોએ કર્યો હતો. શહેર પોલીસ ગુનો નોંધી કાયદેસરની કાર્યવાહી હાથ ધરી છે.

તાળા તોડ્યા પણ તસ્કરોના હાથે કંઇ ન લાગ્યું

મામલતદારની કચેરીની બહારથી બાઇક ચોરાઇ
જ્યારે બીજી તરફ દાહેદના મામલતદારની કચેરીએ તાલુકાના જ ખરોડ ગામના વાણિયા વાવ ફળિયામાં રહેતા પ્રતાપભાઇ હિંમતસિંહ ગુંડિયા કોઇ કામ અર્થે આવ્યા હતા. તે દરમિયાન તેમણે પોતાની મોટર સાયકલ ઓફિસની બહાર મસ્જીદ પાસે તાળુ મારીને પાર્ક કરી હતી. આ મોટર સાયકલ કોઇ તસ્કર તાળુ તોડીને ઉઠાવી જતાં તેમણે પણ શહેર પોલીસ મથકે ફરિયાદ નોધાવી છે. પોલીસે આ અંગે વધુ તપાસ હાથ ધરી છે.