દાહોદના દેવગઢ બારીઆ નગરમાં એક મહિલા બેંકમાંથી રોકડ ઉપાડી બસ સ્ટેશનથી બસમાં બેઠા હતાં જ્યાં ચોર મહિલાની નજર ચુકવી બેગની ચેઈન ખોલી બે લાખ 40 હજાર રોકડા લઈ નાસી જતાં સમગ્ર પંથકમાં ચકચાર મચી જવા પામી છે.

પંચમહાલ જિલ્લાના ગોધરાના બામરોલી રોડ ખાતે દિવનગર સોસાયટીમાં રહેતા 37 વર્ષીય કૈલાશબેન જેન્તીભાઈ પટેલ ગત તારીખ 19 ફેબ્રુઆરીના રોજ દેવગઢ બારીઆ નગરમાં આવેલ એસ.બી.આઈ. બેંકમાં ગયા હતા. તેમણે બેંકમાંથી બે લાખ 40 હજાર રોકડા ઉપાડ્યાં હતા અને આ રકમ બેગમાં ભરી દેવગઢ બારીઆ બસ સ્ટેશને આવી બસમાં બેઠા હતા.

બસમાં બેઠેલાં કૈલાશબેનની નજર ચુકવી એક શખ્સ આ બેગની ચેઈન ખોલી બે લાખ 40 હજાર રોકડા લઈ નાસી જતાં કૈલાશબેને બુમાબુમ કરી મુકતા આસપાસના લોકો દોડી આવ્યાં હતાં, પરંતુ ચોર નજરે ન પડતાં આખરે કૈલાશબેને નજીકના પોલીસ સ્ટેશને જઈ ફરિયાદ નોંધાવી હતી. પોલીસે નજીકના સીસીટીવી કેમેરા સહિતના ઉપકરણોની મદદથી ચોરને ઝડપી પાડવા ચક્રો ગતિમાન કર્યાં છે.