પ્રતિકાત્મક તસવીર

દાહોદ જિલ્લા પોલીસ વડા હિતેશ જોયસરના માર્ગદર્શન હેઠળ એલસીબી દ્વારા જાહેરમાં જુગાર રમતા હોવાની બાતમીના આધારે તપાસ કરાઇ રહી છે. જેમાં ફતેપુરા તાલુકાના સુખસરમાં પંચાલ ફળિયા ખાતે બે સગા ભાઈઓ દિવ્યાંગ ગેલોત અને હરપાલ ગેલોત મોબાઈલ મારફતે ઓનલાઇન લુડો કીંગ ગેમ મારફતે જુગાર રમાડતાની બાતમીથી શનિવારની રાત્રે સુખસર પોલીસ સ્ટાફ સહિત એલસીબી પોલીસના હીરેન્દ્રસિંહ સોલંકી, પ્રકાશભાઈ સહિત સ્ટાફે બંને સગા ભાઈઓની ધરપકડ કરી હતી.

બંને ભાઈઓ અલગ અલગ મોબાઈલમાં સોશિયલ મિડિયાના ગ્રુપ બનાવી લુડો કિંગ જુગાર રમાડતા હોવાની પુષ્ટી થઇ હતી. ગ્રુપમાં 95 અને 44 થઈ 139 સભ્યો હોવાનું પોલીસને જાણવા મળ્યું હતું. જેમાં કેટલાક સભ્યો રૂા.5000 અને રૂા.6000ની ગેમ રમાઈ હોવાની પણ પુષ્ટી થઇ હતી. ત્રણ મોબાઇલ મળી રૂપિયા 30 હજારનો મુદ્દામાલ જપ્ત કરી બન્ને ભાઇઓની ધરપકડ કરી પોલીસે આગળની કાર્યવાહી હાથ ધરી હતી.