ઝુસાથી સાગી લાકડા ભરી જતી પીકઅપને ફિલ્મી ઢબે પીછો કરી વનવિભાગે ચાકીસણાથી ઝડપી પાડી

સંજેલી તાલુકાના ઝુસા ડેડીયાથી ગેરકાયદેસર પિકઅપ ગાડીમાં સાગી માલ ભરી લઈ જવાતો હોવાની બાતમીના આધારે વન વિભાગે ફિલ્મીઢબે પીછો કરી ચાલક અને ગાડી માલિકની મુદ્દામાલ સાથે ઝડપી પાડી કાર્યવાહી હાથ ધરી હતી.

સંજેલી તાલુકામાં મોટાભાગે ડુંગરાળ અને જંગલ વિસ્તાર આવેલા છે. હાલ તો વાતાવરણ અને ઝરમર વરસાદમાં તકનો લાભ લઈ ઝુસામાં ગેરકાયદેસર 20મીના રોજ વહેલી સવારે પીકઅપ ગાડીમાં સાગી લાકડાં લઈ જવાતો હોવાની મળેલી બાતમીના આધારે સંજેલીના રાકેશ વણકરે સ્ટાફ સાથે દોડી જઈ વહેલી સવારે ચાર વાગ્યે વોચ ગોઠવી હતી. બાતમીવાળી પીકઅપ નીકળતાં જ ફિલ્મી ઢબે પીછો કરી લગભગ દસ કિ.મી.બાદ ચાકીસણાથી ઝડપી પાડી હતી. જે બાદ તપાસ કરતાં તેમાંથી સાગી લાકડાના બારી દરવાજા સાઇજો મળી આવતા વન વિભાગના કર્મચારીઓ પણ ચોંકી ઉઠ્યાં હતાં.

ચાલક શૈલેષભાઈ નટવર પીકઅપ માલિક શંકરભાઈ નારસીંગભાઇ બારીયા પાસે પાસ પરમીટ માંગતા કોઈ આધાર પુરાવો મળી ન આવતા સંજેલી વન વિભાગે લાવ્યા બાદ વધુ પૂછપરછ કરાતાં ઝુસા ગામના દિપક છગનભાઇ રાવતનું હોવાનું જણાવતાં તપાસ હાથ ધરી હતી. જ્યાં તપાસ કરતા ઘરેથી રંધા મશીન મળી આવ્યું હતું. તે પણ જપ્ત કરી સંજેલી વનવિભાગ ખાતે લાવવામાં આવ્યું હતું.

આમ સંજેલી વન વિભાગે પચાસ હજાર રૂપિયાનો સાગી માલ ચાર લાખની પિકઅપ અને એક લાખનો રંધા મશીન મળી કુલ 5,50,000ના મુદ્દામાલ સાથે ત્રણ આરોપીની ધરપકડ કરી વધુ તપાસ સંજેલી આરએફઓ રાકેશ જે વણકરે હાથ ધરી છે.