માઉઝર સાથે ઝડપાયેલો યુવક.

દાહોદ એલ.સી.બી.એ પડાવમાંથી શંકાસ્પદ લાગતા બુલેટ ચાલકને પાસેથી માઉઝર, એક કારતુસ તથા મોબાઇલ તેમજ બુલેટ મળી આવતા તેની ધરપકડ કરી હતી. રૂપિયા 95,050ના મુદ્દામાલ જપ્ત કરી શહેર પોલીસ મથકે ગુનો નોંધાવ્યો હતો. દાહોદ એલ.સી.બી.ને ગતરોજ છરછોડા ગામનો એક વ્યક્તિ માઉઝર પિસ્તોલ લઇને જીજે-20-એપી-1262 નંબરની બુલેટ ઉપર દાહોદ આવતો હોવાની બાતમી મળી હતી. જેના આધારે ગતરોજ બપોરના સમયે પડાવ ચોકી પાસે ત્રણ રસ્તા પર વોચમાં હતા.

તે દરમિયાન બાતમી વાળી બુલેટ આવતા ચાલક છરછોડા ગામના વિક્રમ દીપસિંગ પલાસને ઘેરી લઇ રોકી તેની અંગઝડતી લેતાં તેની પાસેથી કમ્મરમાં ખોસી રાખેલ હાથ બનાવટની માઉઝર તેમજ એક કારતુસ મળી આવી હતી. રૂપિયા 10,000ની કિંમતની માઉઝર તેમજ એક કારતૂસ અને 5 હજારની કિંમતનો મોબાઇલ તથા રૂપિયા 80,000ની કિંમતની બુટેલ ગાડી મળી 95,050ના મુદ્દામાલ સાથે ધરપકડ કરી દાહોદ શહેર પોલીસ મથકે તેની સામે ગુનો નોંધાવ્યો હતો. શહેર પોલીસ દ્વારા યુવકની ઘનિષ્ઠ પુછપરછ કરાઇ રહી છે.