દેવગઢ બારિયા તાલુકાના ભથવાડા ગામે ટોલનાકા પાસે એલપીજી ગેસ ભરેલુ ટેન્કર ટોલનાકા બુધવારની સાંજે નજીકના ડિવાઇડર ઉપર ચઢી જવાથી ગેસ ગળતર શરૂ થઇ જતાં દોડધામ મચી ગઇ હતી .દાહોદ અને દેવગઢ બારિયાના ફાયર બ્રિગેડના જવાનોએ તાત્કાલિક ઘટના સ્થળે પહોંચી બાજી સંભાળી લીધી હતી. ફાયર ઓફિસર દીપેશ જૈનને જહેમત બાદ ગળતર બંધ કરવામાં સફળતા મળતાં સૌએ હાશ અનુભવી હતી.

ઘટના પગલે ધસી ગયેલા પીએસઆઇ એન.જે પંચાલ સહિતના પોલીસે ટોલનાકુ ખાલી કરાવી દઇ તેની તમામ લાઇટો પણ બંધ કરાવી દીધી હતી. દાહોદ- ગોધરા હાઇવે બંધ કરી દેવાતાં બંને તરફ 4 કિમી જેટલી વાહનોની કતારો જામી ગઇ હતી. પોલીસે ટ્રાફિકને કંટ્રોલ કરવામાં મહત્વનો ભાગ ભજવ્યો હતો. અંતે ટ્રાફિકને વડોદરા તરફ ડાયવર્ટ કરાયો હતો. દેવગઢ બારીયાના કોળી સમાજ એકતા ગ્રૂપના સ્વયં સેવકો દ્વારા અંધારામાં અટવાયેલા લોકોને ગામડાના રસ્તેથી મુખ્ય રસ્તે સહીસલામત પહોંચાડવાનું સેવા કાર્ય કરાયું હતું. રાતના 10.30 વાગ્યે હાઇવે શરૂ કરવામાં આવ્યો હતો. ગુરુવારના રોજ પુન: ગળતર ન થાય તે પ્રકારે ટેન્કરને ઘટના સ્થળેથી ખસેડવામાં આવ્યું હતું.