પ્રતિકાત્મક તસવીર.

દાહોદ તાલુકાના જાલત ગામે હાઇવે પર બાઇક લઇને રોડની સાઇડમાં ઉભેલા બે વ્યક્તિઓને કારે ટક્કર મારતાં એકનું મોત નિપજ્યું હતું. જ્યારે એકને ગંભીર ઇજાઓ થઇ હતી. આ સંદર્ભે કાર ચાલક વિરૂધ્ધ પોલીસમાં ફરિયાદ નોંધાવી હતી.મધ્યપ્રદેશના ઝાબુઆ જિલ્લાના કુન્દનપુરના નનેશબાઇ ધીસીયાભાઇ ડોડીયાર તથા સુરેશભાઇ દિતાભાઇ ડોડીયાર ગતરોજ પોતાની જીજે-45-એમએન-9372 નંબરની મોટર સાયકલ ઉપર દાહોદથી પોતાના ઘરે જતા હતા.

તે દરમિયાન નનેશભાઇનો મિત્ર વિજય દરૂ ભુરીયા તથા ભારતભાઇ મજીયાભાઇ મેડા જાલત ગામે હાઇવે રોડ ઉપર મળી જતાં તેઓએ મોટર સાયકલ રોડની સાઇડમાં ઉભી રાખી તેમની સાથે વાતો કરતાં હતા. તે દરમિયાન દાહોદ તરફથી પુરઝડપે આવતી જીજે-20-એએચ-5590 નંબરની કારના ચાલકે પોતાનું વાહન પુરઝડપે અને બેફિકરાઇ પૂર્વક હંકારી લાવી અડફેટે લઇ અકસ્માત કરી ગાડી મુકી ભાગી ગયો હતો.

અકસ્માતમાં સુરેશભાઇ દિતાભાઇ ડોયીરાને માથામાં તથા શરીરે ગંભીર ઇજાઓ થવાની ઘટના સ્થળે કમકમાટી ભર્યુ મોત નિપજ્યું હતું. જ્યારે વિજયભાઇ દરૂભાઇ ભુરીયાને ડાબા હાથે તથા ડાબા પગે ફ્રેક્ચર તેમજ ભારતભાઇ મજીયાબાઇ મેડાને પણ સાધારણ ઇજા તથા ડાબા પગે ફ્રેક્ચર અને નનેસભાઇને માથાના ભાગે તથા જમણા પગના ઘુટણ ઉપર સામાન્ય ઇજાઓ થઇ હતી. તેમજ બન્ને વાહનોને નુકશાન થયું હતું. આ સંદર્ભે નનેશભાઇ ડોડીયારે અજાણ્યા કાર ચાલક વિરૂદ્ધ કતવારા પોલીસ મથકે ફરિયાદ નોંધાવી હતી.