• પોલીટેકનિક હોસ્ટેલમાં 120, ખરેડીની એકલવ્ય મોડેલ રેસિડન્સીમાં 150 બેડની સુવિધા
• સિવિલ હોસ્પિટલની જૂની બિલ્ડિંગમાં 200 પથારી કોરોનાના દર્દીઓ માટે રખાશે

દિવ્ય ભાસ્કર

Jul 22, 2020, 04:00 AM IST

દાહોદ. કોરોના વાયરસના સંક્રમણની પ્રવર્તમાન સ્થિતિને ધ્યાને રાખીને જિલ્લા વહીવટી તંત્ર દ્વારા અહીં ઝાલોદ રોડ પર આવેલી સરકારી ઇજનેરી કોલેજમાં નવું કોવિડ કેર સેન્ટર શરૂ કરવામાં આવ્યું છે. જેમાં આરોગ્ય વિભાગ દ્વારા કોરોના દર્દીઓની સારવાર માટે 120 પથારીની વ્યવસ્થા કરવામાં આવી છે. આ ઉપરાંત જરૂર પડે એવા સંજોગોમાં દેવગઢ બારિયામાં 300 બેડ સહિત જિલ્લાના વિવિધ તાલુકાઓમાં કુલ મળી 1400 બેડ તૈયાર રાખવાનું આયોજન પણ કરી લેવામાં આવ્યું છે.

કુલ 40 રૂમમાં કોરોનાના દર્દીઓની સંભાળ લેવામાં આવશે
છેલ્લા એક પખવાડિયાથી દાહોદ જિલ્લામાં કોરોના વાયરસના કેસોનો નોંધાયેલો વધારો ચિંતાજનક છે. એ બાબતને ધ્યાને લઇ કલેક્ટરશ્રી વિજય ખરાડીએ દર્દીઓને સારવારમાં કોઇ કસર ના રહી જાય એવી વ્યવસ્થા કરવા માટે આરોગ્ય તંત્રને સૂચના આપી હતી. હાલમાં દાહોદમાં સરકારી ટેકનિકલ હાઇસ્કૂલ ખાતે એક કોવિડ કેર સેન્ટર કાર્યરત છે. તે બાદ સરકારી ઇજનેરી કોલેજમાં પણ હવે 120 પથારીની સુવિધા ધરાવતું કોવિડ કેર સેન્ટર કાર્યરત કરી દેવામાં આવ્યું છે. ત્યાં કોરોના દર્દીઓના સંભાળ માટેની તમામ પ્રકારની સુવિધા ઉપલબ્ધ કરાવવામાં આવી છે. અહીં એક રૂમમાં ત્રણ પથારી મળી કુલ 40 રૂમમાં કોરોનાના દર્દીઓની સંભાળ લેવામાં આવશે.

આરોગ્ય વિભાગની જરૂરિયાત મુજબ સીસીસી બનાવવામાં આવી રહ્યા છે
દાહોદ જિલ્લા માટે બીજી મહત્વની વાત એ છે કે, ઝાયડ્સ સિવિલ હોસ્પિટલ ખાતે 158 પથારી કોરોના વાયરસના દર્દીઓ માટે છે. તેમાં પણ વધારો કરી જૂની બિલ્ડિંગમાં બીજી વધારાની 200 પથારી કોરોનાના દર્દીઓ માટે બનાવવામાં આવશે. આ ઉપરાંત પોલીટેકનિક કોલેજના હોસ્ટેલ બિલ્ડિંગમાં 120 બેડ તથા ખરેડી ખાતે આવેલી એકલવ્ય મોડેલ રેસીડન્સી સ્કૂલની બે ઇમારતમાં 150 બેડની સુવિધા સાથેના કોવિડ કેર સેન્ટર તૈયાર રાખવામાં આવશે. દાહોદના માર્ગ અને મકાન વિભાગ દ્વારા આરોગ્ય વિભાગની જરૂરિયાત મુજબ સીસીસી બનાવવામાં આવી રહ્યા છે.