પિયરમાં દેવદિવાળીનો તહેવાર મનાવી બાઇક ઉપર પતિ સાથે પરત ઘરે આવતા બાઇક બે વ્યક્તિઓએ તેમની બાઇકને આંતરી મહિલાના ગળામાંથી સોનાનું મંગળસુત્ર ઝુંટવી ફરાર થઇ ગયા હતા. કદવાળના નગીનભાઇ મેસન તથા પત્ની જશોદાબેનને લઇને બાઇક લઇને દેવદિવાળી કરવા સાસરી ચમારીયા ગયા હતા. બપોરે ત્યાંથી ઘરે આવવા માટે નીકળ્યા હતા. ત્યારે ગુંડા ગામે આવેલી રંગલી ઘાટી રોડ પર પ્લેટીના બાઇક ઉપર આવેલા 35 થી 40 વર્ષના લાગતા પેન્ટ શર્ટ પહેરેલા બે વ્યક્તિઓએ નગીનભાઇની મોટર સાયકલને ઓવરટેક કરી તેમની મોટર સાયકલ આડી કરીને ઉભા રાખ્યા હતા.

મોટર સાયકલ ઉપર આવેલા પૈકી પાછળ બેઠેલા વ્યક્તિએ જશોદાબેનને ગળામાં પહેરી રાખેલુ સોનાનું પેન્ડલ સાથેનું મંગળસુત્ર આશરે 35,000 રૂ.ની કિંમતનું ઝુંટવી મોટર સાયકલ લઇને ઝાલોદ તરફ ભાગી ગયા હતા. ત્યાર બાદ નગીનભાઇ મોટર સાઇકલ ઉપર તેમનો પીછો કર્યો હતો પરંતુ કોઇ પત્તો લાગ્યો ન હતો. આ સંદર્ભે જશોદાબેન નગીનભાઇ મેસને બે અજાણ્યા લૂંટારૂઓ વિરૂદ્ધ સંજેલી પોલીસ મથકે ફરિયાદ નોંધાવતાં પોલીસે ગુનો નોંધી લૂંટારૂઓની શોધખોળ માટેના ચક્રો ગતિમાન કર્યા હતા.