દાહોદ તાલુકાના દેલસર ગામે વાહન ચોર ટોળકીએ તરખાટ મચાવતાં એકજ રાત્રીમાં એક ફોર વ્હીલર તેમજ એક મોટર સાઈકલ મળી બે વાહનોનો ચોરી કરતા પંથકમાં ખળભળાટ મચ્યો હતો.દાહોદ જિલ્લામાં વાહન ચોર ટોળકીનો આતંક ફરી વધવા માંડ્યો છે. ત્યારે વાહન ચોરાઈ જતાં વાહન માલિકોમાં પણ રોષની લાગણી વ્યાપી ગઇ છે.

આવા સમયે ફરીવાર વાહન ચોર ટોળકી સક્રિય થઈ છે અને તા.૨૮મી ડિસેમ્બરના રોજ દાહોદના દેલસર ગામે રાયણ ફળિયામાં રહેતા વિનુભાઈ બચુભાઈ ભાભોરની જીજે-20-એ-8563 નંબરની 80,000ની કિંમતની ક્રુઝર ગાડી અને તેમની બાજુમાં રહેતા નરસિંહભાઈ જકલાભાઈ ડિંડોરની જીજે-35-જે-2690 નંબરની 15,000ની કિંમતની મોટર સાઈકલને રાત્રીના સમયે નિશાન બનાવી ચોર તસ્કરો પોતાનો કસબ અજમાવી ચોરી કરી લઇ ગયા હતા. શોધખોળ કરવા છતાં બન્ને વાહનોનો કોઇ પત્તો નહી લાગતાં આ સંબંધે વિનુભાઈ બચુભાઈ ભાભોરે દાહોદ તાલુકા પોલીસ મથકે ફરિયાદ નોંધાવી છે.