સંજેલી તાલુકાના ગોવિંદા તળાઈ ગામે એક મકાનમાં પ્રવેશીને ચાર યુવકોએ રોકડ અને દાગીના મળીને 1.85 લાખ રૂપિયાની ચોરી કરી હતી. આ ચોરી મામલે બે યુવકોના નામની સંજેલી પોલીસ મથકે ફરિયાદ નોંધાઇ છે. પોલીસે ચાર સામે ગુનો દાખલ કરીને આગળની કાયદેસરની કાર્યવાહી હાથ ધરી છે.

સંજેલી તાલુકાના ગોવિંદ તળાઈ ગામે ચરપોટ ફળિયામાં રહેતા કાન્તીભાઈ મતાભાઈ બારીયાના મકાનમાં ગત તા.18મી જાન્યુઆરીના રોજ ચોરી થઇ હતી. ઘરમાં પ્રવેશેલા ચાર તસ્કરોએ કાન્તીભાઈના મકાનમાંથી રોકડા રૂપીયા 60,000, 50 હજારના ચાંદીના દાગીના તથા 75 હજાર રૂપિયાના સોનાના ઝુમ્મર, દોરો, લોકીટ તથા કાનની બુટ્ટીની ચોરી કરી હતી. ઘરમાંથી 1.85 લાખ રૂપિયાની ચોરી મામલે તપાસ કરતાં ભેદ ખુલ્યો હતો. તેમાં આ ચોરી દાહોદના એકનભાઈ રૂપાભાઈ ડીંડોર, કડકીયાભાઈ રાવલાભાઈ ભેદી તથા તેમની સાથે બીજા બે અજાણ્યા ઈસમો દ્વારા કરાઇ હોવાનું સામે આવ્યુ હતું. આ અંગે કાન્તીભાઈ મતાભાઈ બારીયાએ સંજેલી પોલીસ મથકે ફરિયાદ નોંધાવી છે.