આગામી 28 ફેબ્રુઆરીના રોજ સ્થાનિક સ્વરાજની સંસ્થાઓની ચૂંટણી યોજાવા જઇ રહી છે. જેના કારણે મતદારોમાં જાગૃતિ કેળવવા માટે જિલ્લા વહીવટીતંત્ર દ્વારા રવિવારના રોજ સાયકલ રેલીનું આયોજન કરવામાં આવ્યું હતું. આ રેલીનું નેતૃત્વ કલેક્ટર વિજય ખરાડીએ કર્યું હતું.

સાયકલ રેલીની કમાન કલેક્ટરે સંભાળી સાયકલ રેલી પહેલા કલેક્ટરે જણાવ્યું હતું કે, ભારત વિશ્વની સૌથી મોટી લોકશાહી ધરાવતો દેશ છે. જેમાં ચૂંટણી પ્રક્રીયા લોકશાહીની આત્મા છે અને તેને દેશના નાગરિકો ચૂંટણી સમયે મતદાન કરીને જીવંત તથા તંદુરસ્ત રાખે છે. વધુમાં તેમણે જણાવ્યુ હતું કે, મતદાન કરવું તે તમામ નાગરિકોનો બંધારણીય અધિકાર છે. મતદાનમાં લોકોનો મહત્વનો ફાળો રહેલો હોય છે, તેથી લોકોમાં જાગૃતિ કેળવવા માટે અને તેઓ ચૂંટણીમાં સહભાગી બને તે અર્થે કલેક્ટર વિજય ખરાડીએ સાયકલ રેલીની કમાન સંભાળી હતી.

મતદાન જાગૃતિ અર્થે નારાઓ લગાવાયા સાયકલ રેલીમાં અનેક લોકોએ ભાગ લીધો હતો, જેમાં કલેક્ટર વિજય ખરાડી, પાણી પુરવઠા બોર્ડના કાર્યપાલક ઇજનેર એ. એ. પટેલ ઉપરાંત નગરના અન્ય સાયકલિસ્ટો જોડાયા હતા. આ રેલી સર્કિટ હાઉસથી શરૂ કરવામાં આવી હતી અને ત્યારપછી સાયકલ સવારોએ રેલીને આગળ વધારતા નગરના વિવિધ વિસ્તારોમાં ભ્રમણ કર્યું હતું. આ સાયકલ રેલી 13 કિલોમિટર લાંબા રૂટમાં યોજાઇ હતી, જેમાં સાયકલસવારોએ મતદાન અંગે જાગૃતિ ફેલાવતા નારા લગાવીને નગરજનોને મત આપવા માટે અનુરોધ કર્યો હતો.