પ્રતિકારત્મક તસ્વીર

દાહોદ જિલ્લા પંચાયતની 50 અને નવ તાલુકાની 237માંથી 234 તાલુકા પંચાયતના ઉમેદવારોની યાદી ભાજપ દ્વારા ગુરુવારે જાહેર કરવામાં આવી હતી. તેમાં કોઇ કારણોસર દાહોદ તાલુકાના મંડાવાવ, ખરેડી અને ફતેપુરાની સાગડાપાડા બેઠકના ઉમેદવારોની ઘોષણા કરવામાં આવી ન હતી. જિલ્લા અને તાલુકા પંચાયતમાં આ વખતે ગત ટર્મમાં કોંગ્રેસ સાથે છેડો ફાડીને ભાજપમાં જોડાયેલા તમામ સભ્યોને લોકોને પણ સ્થાન આપવામાં આવ્યુ હતું. તો સાથે ભાજપમાં હોદ્દો ધરાવતા પદાધિકારીઓને પણ ઉમેદવારી કરવાની તક આપવામાં આવી હતી.

ઘણા સ્થાને ભાજપના વીજેતા ઉમેદવારોની બાદબાકી કરીને તેમના સ્થાને નવા ચહેરા લાવવામાં આવ્યા હતાં. કેટલાંક જુના સભ્યો પોતાના પરિવારના સભ્યોને ટિકીટ અપાવવામાં સફળ રહ્યા હોવાનું જોવા મળ્યુ હતું. ભાજપના ઉમેદવારોની સૂચિ જાહેર થવા સાથે જ કેટલાંક લોકોમાં અસંતોષ ફેલાયેલો જોવા મળ્યો હતો. તો કેટલાંક લોકો બળવો કરી અપક્ષ કે અન્ય પક્ષમાંથી ઉમેદવારી કરવાની તૈયારીઓમાં પણ જોતરાઇ ગયા હતાં. ભાજપ દ્વારા ડેમેજ કંટ્રોલની કવાયત હાથ ધરાઇ છે પરંતુ કેટલાંક ઉમેદવારોનો અસંતોષ ઠરે છે કે નહીં તે આવનાર દિવસોમાં જાણી શકાય તેમ છે.