દાહોદ તાલુકાના મુવાલીયા સિંચાઈ ડેમના કેનાલમાં ગાબડું પડતાં આસપાસના ખેતરોમાં પાણી ફરી વળતાં ઘઉંના ઉભા પાક સહિત અન્ય પાકને નુકસાન થયું હતું. ગાબડામાંથી બે દિવસથી પાણી વહી રહ્યુ હતુ પરંતુ ધ્યાન અપાયુ ન હતું. જોકે, અંતે ગાબડુ પુરવામાં આવતાં ખેડુતોએ હાશ અનુભવી છે.

પ્રાપ્ત માહિતી અનુસાર, દાહોદ તાલુકાના મુવાલિયા ગામની કેનાલમાં ગાબડુ પડતાં ખેતરોમાં પાણી ફરી વળ્યા હતાં. મુવાલીયા સિંચાઈના મદદનીશ ઈજનેર જે.એન.પરમારે જણાવ્યુ હતું કે, ચોકીદારો દ્વારા તેમને આ ઘટનાની જાણ થઇ હતી. મુવાલીયા સિંચાઈમાં સવારના 11 વાગ્યા ગાબડું પડ્યું હતું. આ મામલે ચોકીદાર દ્વારા તાત્કાલિક કેનાલનો ગેટ બંધ કરી દેવામાં આવતા પાણી બંધ થઇ ગયું હતું. બે દિવસ પહેલા નાનુ ગાબડું પડ્યું હતું અને તેનું સમારકામ કરવામાં આવ્યું હતું અને આગળ જે ખેડુતોને જરૂર હતી પાણીની ત્યાં પાણી પહોંચાડવા માટે કેનાલ ચાલું કરાઇ હતી. જોકે, આ ઘટનાથી કેટલાંક ખેડુતોને નુકસાન વેઠવાનો વારો આવ્યો હતો.