દાહોદ શહેરના ગોદીરોડ પરથી એક યુવક પાસેથી દાહોદ એસ.ઓ.જી. પોલીસે દેશી બનાવટની માઉઝર પિસ્તોલ સાથે ઝડપી પાડી છે. માઉઝર અને મોબાઈલ ફોન મળી કુલ રૂ.18,000નો મુદ્દામાલ પોલીસે જપ્ત કરી કાયદેસરની કાર્યવાહી હાથ ધરી છે.

દાહોદ એસ.ઓ.જી. પોલીસને મળેલી બાતમીના આધારે ગોદી રોડ ખાતે વોચ ગોઠવી ઉભા હતાં. તે સમયે ત્યાં બાતમીમાં દર્શાવેલ એક યુવક પસાર થતાં પોલીસે તેની પુરછપરછ કરી હતી. તેણે પોતાનું નામ રાહુલભાઈ નેવજીભાઈ સંગાડા (રહે.ગોદીરોડ, રેલવે નવી ટીકીટ બારીની સામે, દાહોદ) જણાવ્યું હતું. પોલીસે તેની પુછપરછ કરતાં સંતોષકારક જવાબ ન મળતાં પોલીસે તેની અંગઝડતી કરતાં તેની પાસેથી ગેરકાયદે પાસ પરમીટ વગરની બિન અધિકૃત રીતે પોતાના ઉપયોગ માટે કે, કોઈને વેચવા કે, તબદીલ કરવા પોતે પોતાના અંગ કબજામાં દેશી બનાવટની માઉઝર પિસ્ટલ કિંમત રૂ.15,000ની પોલીસને મળી આવી હતી.

પોલીસે તેની પાસેથી એક મોબાઈલ ફોન પણ કબજે કરી કુલ રૂ.18,000નો મુદ્દામાલ કબજે કરી દાહોદ શહરે પોલીસે ઉપરોક્ત યુવક વિરૂદ્ધ ગુનો નોંધી કાયદેસરની કાર્યવાહી હાથ ધરી છે. ગઈ કાલે પણ દાહોદ શહેર પાસેથી જ એક યુવક માઉઝર સાથે ઝડપાયો હતો. આમ બે દિવસમાં બે આરોપી માઉઝર સાથે ઝડપાતા તેના મૂળ સુધી પહોંચવુ જરુરી છે.