દાહોદ તાલુકાના દેલસર ગામમાં એક પરિવાર છોકરીની અંતિમવિધીમાં ગયા અને તસ્કરો ઉપર ચઢી બારીના ઉપરના ભાગે બનાવેલા બોકારા દ્વારા ઘરમાં પ્રવેશ કરી તીજોરીનું તાળુ તોડી સોના-ચાંદીના દાગીના મળી કુલ 20,000 રૂપિયાના મુદ્દામાલની ચોરી કરી ગયા હતાં. આ સંદર્ભે તાલુકા પોલીસ મથકે ગુનો નોંધાવ્યો હતો.

દાહોદ તાલુકાના દેલસર ગામમાં ડામોર ફળિયામાં રહેતા નિકુંજભાઇ કિરીટભાઇ પંચાલ તેમના પરિવાર સાથે તા.18મીના રોજ બપોરના અઢી વાગ્યાના અરસામાં સામાજીક કામ અર્થે ઘરને તાળુ મારી તેમના મામાના ઘરે ગાંગરડી ગામે ગયા હતા. અને ત્યાંથી તા.19મીના રોજ મધ્યપ્રદેશના વરઝર ગામે રહેતી તેમની બહેનનું અવસાન થતાં સવારના સમયે ગાંગરડીથી વરઝર અંતિમ વિધીમાં ગયા હતા. આ સમય દરમિયાન ચોર તસ્કરોએ નિકુંજભાઇના બંધ ઘરને નિશાન બનાવી ઘર ઉપર ચડી બારીના ઉપરના ભાગે બનાવેલા બાકોરૂ દ્વારા પ્રવેશ કરી ઘરમાં મુકી રાખેલી તીજોરીનું તાળુ તોડી સામાન વેરવીખેર કરી અંદર મુકી રાખેલા સોનાની 13 ગ્રામ વજનની સોનાની 2 ચેન કિં 8,000, જુની સોનાની કડી આશરે 4 ગ્રામ વજનની કિં 3,000, જુની સોનાની વિટી 4 ગ્રામ વજનની કિં 3,000, ચાંદીનો કંદોરો તથા પાયલ 500 ગ્રામ વજન જેની કિંમત આશરે 6,000 મળી કુલ 20,000ની કિંમતના સોના ચાંદીના દાગીનાની ચોરી કરી ગયા હતા. વરઝર ગામેથી અંતિમ વિધી પતાવી સાંજે પરત આવ્યા ત્યારે ઘરમાં તિજોરીનું લોક તુટેલ અને સામાન અસ્તવ્યસ્ત જોવા મળતાં ચોરી થઇ હોવાનું જણાયું હતું. આ સંદર્ભે નિકુંજભાઇએ દાહોદ તાલુકા પોલીસમાં ફરિયાદ નોંધાવતાં ગુનો નોંધી પોલીસે તપાસ હાથ ધરી હતી.