ખંગેલા ગામની એક 16 વર્ષ અને 10 મહિનાની તરૂણી તા.29મી એપ્રિલના રાત્રીના સમયે પોતાના ઘરમાં સુતી હતી. તે દરમિયાન મધ્યપ્રદેશના ઝાબુઆ જિલ્લાના પીટોલ તાલુકાના ઢેકળ ગામનો દિનેશ શકરીયા બબેરીયા રાત્રીના સમયે તેના ઘરે આવ્યો હતો અને તરૂણીને પ્રેમના પાઠ ભણાવી પોતાની પત્ની તરીકે રાખવા માટે અપહરણ કરી લઇ ગયો હતો. સવારે તરૂણી ઘરમાં જોવા ન મળતાં પરિવારે આજુબાજુ તથા ગામમાં શોધખોળ કરી હતી પરંતુ કોઇ પત્તો લાગ્યો ન હતો.

શોધખોળ દરમિયાન મધ્યપ્રદેશના ઢેકળ ગામનો દિનેશ શકરીયા બબેરીયા તરૂણીને પત્ની તરીકે રાખવા અપહરણ કરી ગયો હોવાનું જાણવા મળતાં તરૂણીના પિતાએ કતવારા પોલીસ મથકે દિનેશ શકરીયા બબેરીયા વિરૂદ્ધ ફરિયાદ નોંધાવી હતી. જ્યારે અપહરણની બીજી ઘટના સંજેલી તાલુકામાં બની હતી. જેમાં ફતેપુરા તાલુકાના સાગડાપાડા ગામનો અનિલ ભરત ગરાસીયા તા.20 મેના રજ બપોરના 12 વાગ્યાના અરસામાં તાલુકાના એક ગામની 15 વર્ષ અને 10 મહિનાની તરૂણીને પોતાની પત્ની તરીકે રાખવા માટે અપહરણ કરી લઇ ગયો હતો.

આ સંદર્ભે તરૂણીના પિતાએ અનિલ ભરત ગરાસીયા વિરૂદ્ધ ફરિયાદ નોંધાવતાં સંજેલી પોલીસે અપહરણ તથા પોક્સો એક્ટ મુજબ ગુનો નોંધી તપાસ હાથ ધરી હતી.