દાહોદ જિલ્લાના ઝાલોદ તાલુકાના જેતપુર ગામના સંજયભાઇ લાલાભાઇ મછાર બે માસ પૂર્વે એક યુવતીને પોતાની પત્ની તરીકે રાખવા જતો રહ્યો હતો. જેની અદાવત રાખી ગામના મગરોળ ફળિયાના 20થી 25 વ્યક્તિઓ એકસંપ કરી ગેરકાયદેસર મંડળી બનાવી કીકીયારીઓ કરી હાથમાં લાકડીઓ તથા લોખંડની પાઇપો જેવા મારક હથિયારો સાથે સંજયભાઇના ભાઇ સંદિપભાઇ મછારના ઘરે આવી તેના ઘરના નળીયાને તોડફોડ કરી નુકસાન કર્યુ હતું. તેમજ ઘરમાં ઘૂસી તિજોરીને તથા પતરાની પેટીને તોડી નાખી ઘરનો સરસામાન પણ વેરવિખેર કરી તેમજ વાસણોની પણ તોડફોડ કરી ભાગી ગયા હતા. આ સંદર્ભે સંદિપભાઇ લાલાભાઇ મછારે સાત જેટલા લોકો સામે ફરિયાદ નોંધાવતાં પોલીસે ગુનો નોંધી આગળની કાર્યવાહી હાથ ધરી હતી.