દાહોદ જિલ્લામાં શુક્રવારે ઝાલોદ ગ્રામ્યના એકસાથે 9 કેસ સાથે કોરોનાના 14 નવા સંક્રમિત નોંધાયા હતા. Rtpcr ટેસ્ટના 325 સેમ્પલો પૈકી તમામ 14 પોઝિટિવ કેસ નોંધાયા હતા. તો રેપીડના તમામ 562 સેમ્પલોના રિપોર્ટ નેગેટિવ આવ્યા હતા. આ 14 કેસમાં દાહોદ શહેર અને લીમખેડાના 1-1 કેસ સાથે દેવગઢ બારીયા અર્બનના 3 નવા કેસ હતા. આ સાથે જિલ્લામાં સાજા થયેલા 5 દર્દીઓને ડિસ્ચાર્જ કરાતા હવે કોરાનાના એક્ટિવ કેસોની સંખ્યા 84 થઇ છે. તા.14 થી 20 માર્ચના છેલ્લા એક સપ્તાહમાં જ જિલ્લામાં કુલ મળીને 71 નવા કેસ નોંધાયા છે. જિલ્લાના શહેરી અને ગ્રામ્ય બંને વિસ્તારોમાં પુન: વકરતા જતા કોરોનાને લઈને લોકોમાં ગભરાટ વ્યાપ્યો છે.

જિલ્લામાં 11587 કોરોના ફ્રન્ટલાઇન વોરિયર્સે રસીનો બીજો ડોઝ લીધો
દાહોદ જિલ્લામાં કોરોનાને રોકવા માટે મહેનત કરી રહેલા વોરિયર્સને રસીકરણમાં પ્રાથમિક્તા આપી છે. અત્યાર સુધીમાં આવા 11587 કોરોના વોરિયર્સએ રસીનો બીજો ડોઝ લઇ ચૂક્યા છે. વિભાગ પ્રમાણે જોઇએ તો શિક્ષણ વિભાગના 8278, પોલીસના 2198, નગરપાલિકાના 90, મહેસુલના 407, જિલ્લા પંચાયત અને તાલુકા પંચાયતના 586 તથા પશુપાલન વિભાગના 20 કર્મચારીઓએ કોરોના રસીનો બીજો ડોઝ લીધો છે. અત્યાર સુધીમાં આ કામગીરી 74 ટકા જેટલી થઇ છે.