દાહોદ જીલ્લા કલેકટર દ્વારા ૫૬ જેટલી સસ્તા અનાજ ની દુકાનોની આકસ્મિક તપાસ કરવામાં આવી છે. અનાજ વિતરણમાં ગંભીર ક્ષતિઓ જોવા મળતાં દાહોદ તાલુકાની 3 દુકાનોને 3 માસ માટે, સંજેલી તાલુકાની જસુણી ગામની 2 દુકાનોના 2 માસ માટે પરવાના સસ્પેન્ડ કરાતાં સસ્તા અનાજના દુકાનદારોમાં ફફડાટ ફેલાઈ જવા પામ્યો હતો.

અન્ન અને નાગરિક પુરવઠા વિભાગ દ્વારા કોરોના વાયરસની વ્યાપક અસરના કારણે જાહેર વિતરણ વ્યવસ્થા હેઠળના લાભાર્થીઓને માહે મે – 2021 દરમ્યાન કેન્દ્ર સરકાર પુરસ્કૃત પ્રધાનમંત્રી ગરીબ અન્ન યોજના હેઠળ મફ્તમાં તથા એનએફએસએ યોજના અંતર્ગત પ્રમાણસર અને નિયત દરથી રાશન આપવામાં આવે છે કે કેમ? જેની ચકાસણી કરવા માટે કલેક્ટર, દાહોદના તારીખ 21 મેના હુકમથી દાહોદ જિલ્લાની 56 જેટલી વ્યાજબી ભાવની દુકાનોની પ્રાંત અધિકારી અને મામલતદારો મારફતે આંતર તાલુકા તપાસ કરવામાં આવી હતી. તપાસ કરી અહેવાલ કલેક્ટરને રજુ કરવામાં આવ્યાં હતાં જે અન્વયે નિયુક્ત અધિકારી દ્વારા 56 વ્યાજબી ભાવની દુકાનની આકસ્મિક તપાસણી કરવામાં આવી હતી.

તપાસમાં ગંભીર ક્ષતિઓના આધારે દાહદોદ તાલુકાની 03દુકાનોને 03 માસ માટે, સંજેલી તાલુકાની જસુણી વ્યાજબી ભાવની દુકાનને 2 માસ માટે મોકુફ રાખવામાં આવી હતી જ્યારે અન્ય 52 વ્યાજબી ભાવની દુકાનોમાં તપાસણી દરમ્યાન તમામ ક્ષતિઓ સંદર્ભે નોટીસ ફટકારવામાં આવી હતી અને સરકારના નિયમોનુસાર નિયત કાર્યવાહી પણ કરવામાં આવનાર છે.