આરોપી

ઝાલોદમાં ભાજપના કાઉન્સિલર હિરેન પટેલની સોપારી આપીને હત્યા કરવાના પ્રકરણમાં પકડાયેલા ઇમુ ડાંડને બુધવારે કોર્ટ સમક્ષ રજૂ કરવામાં આવ્યો હતો. કોર્ટે તેને 5 દિવસ સુધી રિમાન્ડ ઉપર રાખવાની પોલીસને પરવાનગી આપી છે.

ઝાલોદમાં 27 સપ્ટેમ્બરે ભાજપના કાઉન્સિલર હિરેન પટેલની જીપની ટક્કર મારીને હત્યા કરી દેવાઇ હતી. આ ગુનાઇત કાવતરામાં ગોધરા કાંડના આરોપી ઇરફાન પાડા, ઝાલોદના જ અજય કલાલ સહિતના છ લોકોની ધરપકડ બાદ ઝાલોદના જ ઇમરાન ઉર્ફે ઇમુ ડાંડનું નામ પણ સોપારી આપવામાં સામે આવ્યું હતું. એટીએસના હાથે હરિયાણાથી પકડાયેલા ઇમરાને આ હત્યામાં કોંગ્રેસના ધારાસભ્ય અમીત કટારાની સંડોવાણી દર્શાવી હતી. ઇમરાનને દાહોદ પોલીસને સોંપતા ધરપકડ કરી હતી. બુધવારના રોજ ઇમરાનને પોલીસે ઇમરાનને કોર્ટ સમક્ષ ઓનલાઇન રજૂ કર્યો હતો. ફરાર થયા બાદ ક્યાં – ક્યાં આશ્રય મેળવ્યો, સોપારીની રકમ કેટલી હતી, અમીત સિવાયના હજી કેટલા લોકો આ હત્યામાં શામેલ છે તે સહિતના મુદ્દા રજૂ કરીને 14 દિવસના રિમાન્ડની માગ કરી હતી. કોર્ટે ઇમરાનને રવીવારની બપોર સુધી 5 દિવસ રિમાન્ડની પરવાનગી આપી હતી. હવે ઇમરાનની પુછપરછ દરમિયાન હત્યા પાછળ હજી કોની સંડોવણી છે અને બીજુ શું-શું ધરબાયેલુ છે તે સામે આવે તેવી આશંકાઓ વ્યક્ત કરાઇ રહી છે.