પ્રતિકાત્મક તસવીર.

પંચમહાલ ગોધરા રેન્જના નાયબ પોલીસ મહાનિરીક્ષક એસ.એસ.ભરાડાની સૂચનામાં પોલીસ અધિક્ષક હિતેશ જોયસરે દારૂબંધીની કડક અમલવારી કરાવવા તેમજ અસામાજીક પ્રવૃત્તિ નેસ્તનાબૂદ કરવા જિલ્લાના દારૂના બુટલેગરો સામે અટકાયતી પગલા લેવા માટે જિલ્લાના પોલીસ અધિકારીઓને સૂચના કરી હતી. જે અનુસંધાને દાહોદ પોલીસે જિલ્લામાં દારૂના ગુનામાં સંડોવાયેલા તેમજ લીસ્ટેડ બુટલેગરોની યાદી તૈયાર કરી.

તેમના વિરૂદ્ધ પાસા પ્રપોઝલ તૈયાર કરી કલેક્ટરને મોકલતાં તેનો અભ્યાસ કરી બારિયા પોલીસ સ્ટેશન વિસ્તારમાં ગેરકાયદે દારૂની હેરાફેરી કરી દારૂ પુરો પાડનાર બુટલેગર ગોધરાના રેલવે સ્ટેશનની સામે સીંગલ ફળિયામાં રહેતો અને મુળ દાહોદ જિલ્લાના કતવારાના બામન ફળિયાનો સલમનાખન ઉર્ફે સલીમ અલીયારખાન પઠાણનું પાસા પ્રપોઝલ કલેક્ટરે મંજૂર કરતાં પોલીસ અધિક્ષક હિતેશ જોયસરે પાસાના હુકમની બજવણી કરવા માટે સૂચના કરતાં LCB પીઆઇ બી.ડી.શાહ તથા પીએસઆઇ પી.એમ.મકવાણા તથા પેરોલ ફર્લો સ્કોર્ડના પીએસઆઇ આઇ.એ.સિસોદીયા તેમજ સ્ટાફની ટીમો દાહોદ શહેર પોલીસ સ્ટેશન વિસ્તારમાં પેટ્રોલીંગમાં હતા. ત્યારે બાતમી આધારે મંડાવાવ ચોકડી ઉપર વોચ ગોઠવી સલમનાખન ઉર્ફે સલીમ અલીયારખાન પઠાણને ઝબ્બે લઇ પાસા હુકમની બજવણી કરી પોલીસ જાપ્તા હેઠળ પોરબંદરની જિલ્લા જેલમાં મોકલી આપ્યો હતો.