અમદાવાદ સહિત ચાર જિલ્લાની છ ઘરફોડ ચોરીમાં સંડોવાયેલા ગરબાડા તાલુકાના બે યુવકોની મહેસાણા પેરોલ ફર્લો સ્કવોડે દ્વારા ધરપકડ કરી છે. જેઓ મહેસાણા, બનાસકાંઠા, અમદાવાદ અને બોટાદ જિલ્લાની 6 ચોરી કબૂલી છે. મહેસાણા જિલ્લામાં કડીના કડીના ડરણ, વિજાપુર અને ઊંઝાના બ્રાહ્મણવાડા પાસે ચોરી કર્યાનું ખુલતાં પોલીસે ચોરીનો મુદ્દામાલ રિકવર કરવા તજવીજ કરી છે.

પેરોલ ફર્લો સ્કવોડના પીએસઆઇ ડી.એન. વાંઝા અને સ્ટાફે એસપી ડૉ. પાર્થરાજસિંહ ગોહિલની સૂચના મુજબ વણ શોધાયેલા ગુના ઉકેલવા બાતમીદારો અને સાયબર સેલની મદદ લેતાં દાહોદ ગેંગની સંડોવણી જણાઇ આવી હતી. જેને પગલે પોલીસે શહેરમાંથી પકડેલા દાહોદના ગરબાડા તાલુકાના આમલી ખજુરીયા ગામના પલાસ વિજય દિપાભાઇ (24) અને પલાસ નિલેશ ઉર્ફે લીલો સુભાષ નગરસીંગ (21)એ કડીના ડરણ સહિત 6 સ્થળોએ ચોરી કર્યાની કબૂલાત કરી હતી.

ઝડપાયેલા ચોરોએ આ ગુનાની કબૂલાત કરી છે

​​​​​​​દાહોદ ટોળકી અગાઉ રોડ બનાવવાની મજૂરીએ આવી ચોરીની જગ્યાઓ જોઇ જાય છે અને પછી ચોરીને અંજામ આપે છે. સૌથી વધુ તેઓ હાઇવે સાઇડે આવેલી કોટન જિનિંગ મિલોને નિશાન બનાવે છે. ઝડપાયેલા વિજય પલાસ સામે વર્ષ 2017માં વલસાડ જિલ્લાના પારડી પોલીસ સ્ટેશનમાં ચોરીનો ગુનો નોંધાયેલો છે.