દાહોદ ખાતે આ વર્ષે કોરોનાના ભયને લઈને દીપોત્સવની નહિંવત્ પ્રમાણમાં ઉજવણી થવા પામી હતી.સામાન્ય રીતે દાહોદના એમ.જી.રોડ અને સ્ટેશન રોડ ઉપર હકડેઠઠ માનવમેદની ઉભરાતી હોય તેવા ધનતેરસથી નવા વર્ષ સુધીના દિવસો દરમિયાન આ વર્ષે યુવાવર્ગ સિવાયના દાહોદવાસીઓએ બહાર નીકળવાનું ટાળ્યું હતું. શહેરના સ્ટેશન રોડ ખાતે સાંજથી મોડી રાત સુધી મોટી સંખ્યામાં યુવાવર્ગ ટોળે વળતા પોલીસ તંત્ર દ્વારા તેમને વારંવાર ભગાવવામાં પણ આવ્યા હતા.

જો કે તે સિવાયના દાહોદવાસીઓએ દાહોદમાં કોરોના સંક્રમિતોની સંખ્યા સતત વધતી હોઈ તકેદારી દાખવીને પોતાના ઘરે જ દીપોત્સવી ઉજવણી કરવાનું મુનાસિબ સમજ્યું હતું. ગાયગોહરીના ક્યાંક ક્યાંક નાના પાયે થયેલા આયોજનો સિવાય આતશબાજી, મિત્ર વર્તુળના મેળાવડા, હોટલોમાં જમવાના વગેરે જાહેર ઉજવણીના આયોજન પણ જડબેસલાક બંધ રાખ્યા હતા.