દેવગઢ બારિયા તાલુકાના ભથવાડા ગામે એક મકાનમાં આકસ્મિક આગ લાગતા ઘરવખરી સામાન સહિત પુત્રીને આપવાનું કરિયાવર પણ બળીને ખાખ થઈ ગયુ હતુ. તેથી પુત્રીના પિતા ઉપર જાણે આભ તૂટી પડયું છે. ત્યારે સ્થાનિક રાજ્યકક્ષાના મંત્રી પણ ઘટના સ્થળે દોડી ગયા હતા.

ફાયર બ્રિગેડ પહોંચે તે પહેલા તો જોત જોતામાં ઘરવખરી બળીને ખાખ થઈ

દેવગઢ બારિયા તાલુકાના ભથવાડા ગામના પટેલ ફળિયામાં રહેતા અમરસિંહ ધીરુભાઈ પટેલના ઘરે સાંજના સમયે ઘરમાં એકાએક આગ લાગતાં ઘરના સભ્યો કંઈક વિચારે તે પહેલાં જ જાણે ક્ષણ ભરમાં આગે વિકરાળ સ્વરૂપ ધારણ કરી લીધુ હતુ. ઘર આગની લપેટમાં આવી જતા આસપાસના લોકો આગ બુઝાવવા માટે દોડી આવ્યા હતા. ત્યારે આગ બેકાબૂ બનતા બનાવની જાણ દેવગઢ બારિયા ફાયર બ્રિગેડને કરવામાં આવતા ફાયર બ્રિગેડ પહોંચે તે પહેલા તો જોત જોતામાં ઘરવખરી બળીને ખાખ થઈ ગઇ હતી.

જિંદગીભરની કમાણી એક જ પળમાં બળીને ખાખ થઇ

તેમજ ઘરમાં પુત્રીના લગ્ન હોવાથી તે પુત્રીને આપવા માટે મુકેલા કરિયાવર, દર દાગીના કપડાં સહિત બાઈક બળીને ખાક થઈ ગઈ હતી. ત્યારે આ બનાવથી જે પુત્રીના લગ્નની તૈયારીઓ ચાલતી હતી ત્યાં જ આકસ્મિક ઘરમાં આગ લાગતા જાણે જિંદગીભરની કમાણી એક જ પળમાં બળીને ખાખ થઇ જતા આ પરિવાર ઉપર જાણે આભ તૂટી પડયું હોય તેમ છે. ત્યારે આ બનાવની જાણ સ્થાનિક રાજ્યકક્ષાના મંત્રી બચુભાઇ ખાબડને થતા તેઓ પણ ઘટનાસ્થળે દોડી ગયા હતાં. અને મકાનમાલિક અમરસિંહભાઈ પટેલને તાત્કાલિક 10,000 રૂપિયાની આર્થિક સહાય કરી હતી.